Heimir Guð­jóns­son: Ef það var ein­hvern tíma lag að vinna Víking þá var það núna

Öll mörk Víkinga urðu til í kjölfarið á misheppnuðu uppspili úr öftustu línu. Heimir kennir röngum ákvörðunum um.

„Við gáfum of auðveld mörk og bara rangar ákvarðanir. Mér fannst pressan hjá Víking ekki góð og við hefðum átt að gera miklu betur að spila okkur í gegnum hana. Engu að síður erfiður útivöllur og að mínu mati búið að vera besta lið landsins síðan 2020 og við verðum bara að kyngja þessu og halda áfram.“

„Við vorum bara ekki að taka nógu góðar ákvarðanir á boltanum og vorum étnir. Við þurfum að mixa þessu upp hvenær á að spila stutt og hvenær á að spila langt og við gerðum það ekki nógu vel.“

Heimir tekur þó ýmislegt jákvætt út úr leiknum.

„Það jákvæða er það að við erum samkeppnishæfir við Besta lið landsins og við verðum að taka því þannig og halda áfram.“

En hvað vantaði upp á að mati Heimis?

„Það vantaði bara betri ákvarðanatöku á síðasta þriðjung og við fengum einhver færi, en eins og ég sagði fyrir leikinn þá þegar við komumst í gegnum fyrstu pressuna þá voru okkur allir vegir færir. Það voru því pínu vonbrigði að við skyldum ekki getað spilað okkur betur í gegnum þá.“

Heimir tók bæði Kristján Flóka Finnbogason og Björn Daníel Sverrisson út af á 64. mínútu, en þeir báðir voru mjög öflugir í síðasta leik FH sem vannst 3-0 gegn Val. Ástæðan fyrir skiptingunum var þó einföld.

„Þeir voru bara orðnir þreyttir. Miklu betra að fá ferska fætur inn á. Ég viðurkenni það að, Björn spilaði 90 mínútur á móti Val og ég ætlaði að reyna að koma honum fyrr út af en náði því ekki.“