Kristian Nökkvi skoraði og lagði upp

Miðjumaðurinn efnilegi er á láni hjá Sparta frá stórliði Ajax og var í byrjunarliðinu í kvöld. Hann lagði upp fyrsta mark leiksins á 57. mínútu en það skoraði Mitchell van Bergen með góðu skoti í slá og inn.

Mike Eerdhuijzen bætti við öðru markinu áður en Kristian Nökkvi fékk góða sendingu inn fyrir vörn Almere og kláraði færið af mikilli yfirvegun. Kristian Nökkvi spilaði allan leikinn á miðju Sparta á meðan Nökkvi Þeyr Þórisson kom inn af bekknum í uppbótartíma.

Eftir sigur kvöldsins er Sparta í 11. sæti með 38 stig að loknum 31 leik.