Völlurinn í Grinda­vík metinn öruggur

Þetta kom fram á samráðs- og upplýsingafundi í Grindavík á mánudaginn þar sem mættir voru fulltrúar Grindavíkurbæjar, UMFG, KSÍ, Íslensks toppfótbolta, slökkviliðs og lögreglu auk öryggisstjóra vettvangsstjórnar í Grindavík og jarðfræðinga frá Eflu og ÍSOR. 

Um þetta er fjallað á vef Grindavíkurbæjar þar sem segir að nýjustu gögn og niðurstöður jarðsjármælinga sýni að ekkert bendi til hættu á yfirborði Grindavíkurvallar (eða Stakkavíkurvallar eins og hann er nú nefndur eftir styrktaraðila). Jarðfræðingar staðfesti að berggrunnur á svæðinu sé öruggur og að búið sé að grípa til viðeigandi öryggisráðstafana þar sem sprungur nálgist íþróttasvæðið.

Karla- og kvennalið Grindavíkur léku heimaleiki sína á síðustu leiktíð í Safamýri, á svæði Víkings í Reykjavík, vegna eldgosanna á Reykjanesskaga. Kvennaliðið hefur nú sameinast Njarðvík og spilar heimaleiki sína í Reykjanesbæ en snemma var stefnan sett á að karlaliðið myndi spila sína heimaleiki í Grindavík. Um það fjallaði Vísir strax í febrúar.

Öll mannvirki sem tengjast knattspyrnuvellinum, það er að segja búningsklefar og áhorfendastúka, hafa verið metin örugg til notkunar sem og völlurinn sjálfur. Engar skemmdir voru sjáanlegar við skoðun 30. apríl og engin merki um hreyfingar. Knattspyrnudeild UMFG hefur svo unnið ítarlega rýmingaráætlun, sem lögð hefur verið fyrir viðeigandi viðbragðsaðila, svo að hægt sé að rýma svæðið fljótt ef þess gerist þörf.

Fram kemur á vef Grindavíkurbæjar að öll svæði í bænum sem metin hafi verið hættuleg hafi verið girt af með tveggja metra háum girðingum og merkt með skiltum sem banni umferð. Búið sé að gera við fjölmargar sprungur innan bæjarins á undanförnum mánuðum og svæði í bænum staðist umfangsmiklar álagsprófanir.

Grindvíkingar hvetja gesti til að koma í heimsókn og minna á að bærinn hafi verið opinn almenningi frá 21. október í fyrra. Þá er þess getið að ef breyting verði á hættustigi verði staða Grindavíkurvallar þegar í stað endurmetin í samstarfi við sérfræðinga.

Haldið var upp á 90 ára afmæli UMFG í síðustu viku og voru íþróttamannvirki félagsins þá opnuð almenningi í fyrsta sinn frá því að bærinn var rýmdur 10. nóvember 2023. Gleðin skein úr hverju andliti í íþróttasalnum og á sama tíma var fótboltaæfing í gangi á Grindavíkurvelli og sundlaugin full af fólki.

Nú þegar ljóst er að Grindavík mun að óbreyttu spila heimaleiki sína í fótbolta í Grindavík í sumar er svo næsta skref mögulega að körfuboltalið félagsins spili sína heimaleiki einnig í Grindavík á næstu leiktíð.

„Við tökum þetta í smáskömmtum. Fótboltinn tekur af skarið og verður með alla heimaleiki hérna í sumar og svo stefnum við á að karfan spili alla vega einhverja leiki hérna í haust, þegar nýtt tímabil byrjar. Áður en við vitum af verður allt komið á fullt aftur,“ sagði Klara Bjarnadóttir, formaður UMFG, við Stöð 2 í síðustu viku.