Kol­beinn vildi rautt á Arnór Ingva í dramatískum sigri

Alls voru þrír Íslendingar sem byrjuðu leikinn. Arnór Ingvi og Ísak Andri Sigurgeirsson hófu leik hjá heimaliðinu á meðan Kolbeinn var á miðjunni hjá Gautaborg. Staðan var 2-0 í hálfleik eftir að Ísak Andri hafði lagt upp fyrra mark Norrköping á 41. mínútu. Síðara mark liðsins kom svo í uppbótartíma fyrri hálfleiks.

Arnór Ingvi var hins vegar heppinn að vera enn inn á vellinum þarna eftir skelfilega tæklingu á Kolbein sem var allt annað en sáttur. Hann var gripinn í viðtal í hálfleik þar sem hann sagði einfaldlega að tæklingin verðskuldaði rautt spjald.

Sá hlær best sem síðast hlær þar sem Gautaborg skoraði þrjú í síðari hálfleik og vann frábæran 3-2 sigur.

Gautaborg er því eftir fimm umferðir í 6. sæti með níu stig. Norrköping er í 11. sæti með sex stig.