Sýknaður í Ímon-málinu tíu árum seinna

Steinþór var sakfelldur bæði í héraði og í Hæstarétti fyrir markaðsmisnotkun í starfi sínu sem þáverandi forstöðumaður verðbréfamiðlunar Landsbankans fyrir að kynna kaup Ímons á hlutabréfum í bankanum sem raunveruleg viðskipti, í miðju bankahruninu árið 2008.

Dómur Landsréttar var kveðinn upp klukkan 14 en hefur ekki verið birtur.

Dómar í sama máli mildaðir

Hann hlaut níu mánaða dóm á báðum dómstigum en í Hæstarétti voru sex mánuðir dómsins skilorðsbundnir. Sá dómur gekk árið 2015.

Í sama máli hlutu þau Sigurjón Þ. Árnason, þáverandi bankastjóri Landsbankans, og Elín Sigfúsdóttir, þáverandi framkvæmdastjóri fyrirtækjasviðs Landsbankans, fangelsisdóma.

Þau fengu mál sín endurupptekin fyrir Hæstarétti árið 2021 og dómar þeirra voru mildaðir verulega. Sigurjón hlaut skilorðsbundna refsingu og Elínu var ekki gerð refsing þar sem hún hafði þegar afplánað refsingu samkvæmt enduruppteknum dómi.

Fór í Landsrétt frekar en Hæstarétt

Steinþór fékk einnig endurupptöku í málinu en þar sem lögum hafði verið breytt þegar beiðni hans barst var málinu vísað til Landsréttar frekar en Hæstaréttar líkt og mál þeirra Sigurjóns og Elínar. 

Ímon-málið er eitt hrunmálanna svokölluðu þar sem dómar hafa verið enduruppteknir vegna vanhæfis Hæstaréttardómara sem dæmdu fólk í fangelsi fyrir aðkomu þess að aðdraganda efnahagshrunsins árið 2008. Dómararnir voru taldir vanhæfir vegna hlutabréfaeignar þeirra í viðskiptabönkunum þremur. Í máli þessu var það hlutabréfaeign dómara í Landsbankanum sem olli vanhæfi hans.

Fréttin verður uppfærð.