Arctic Adventures kaupir Happy Campers

„Með kaupunum mun Arctic Adventures geta boðið viðskiptavinum sínum enn meiri fjölbreytni í ferðaþjónustu, þar sem samruni fyrirtækjanna gerir kleift að samþætta húsbílaferðir við aðrar upplifunarferðir og áfangastaði. Þetta mun auðvelda ferðalöngum að skipuleggja og njóta ferða sinna um Ísland með auknum sveigjanleika og þægindum,“ segir í tilkynningunni.

Þar kemur fram að fyrirtækjaráðgjöf Íslandsbanka hafi séð um söluferlið á Happy Campers, Lex hafi veitt seljendum ráðgjöf og Logos verið ráðgjafi kaupanda. Þá kemur fram að kaupin séu gerð með fyrirvara um samþykki samkeppnisyfirvalda.

„Við erum spennt að sameina krafta okkar við Happy Campers og gera okkur kleift að bjóða viðskiptavinum okkar enn betri og fjölbreyttari þjónustu. Happy Campers fellur vel að starfsemi Arctic Adventures sem er eitt öflugasta og rótgrónasta ferðaþjónustufyrirtæki landsins,“ er haft eftir Ásgeiri Baldurs, forstjóra Arctic Adventures

„Við óskum Arctic Adventures til hamingju með kaupin og óskum þeim velfarnaðar um komandi ár í landslagi íslenskrar ferðaþjónustu. Það hefur verið ævintýralega skemmtilegt ferðalag að byggja upp Happy Campers að blómlegu fjölskyldu fyrirtæki, fyrst sinnar tegundar á Íslandi, en núna er komið að kaflaskiptum hjá okkur,“ segir Herdís Jónsdóttir, stjórnarformaður Blue Mountain og Happy Campers.