Rigning sunnan- og vestan­til

Á vef Veðurstofunnar segir að það verði áfram suðlæg átt í dag, víða strekkingur eða allhvass vindur, en lengst af hægari og þurrt að kalla fyrir austan. Í kvöld mun svo draga úr vindi og úrkomu sunnan- og vestanlands.

Það verður fremur hlýtt í veðri þar sem hiti verður á bilinu sex til sextán stig og hlýjast fyrir austan.

„Á morgun er útlit fyrir hægari sunnanátt með dálitlum skúrum eða súld, en áfram úrkomulítið á Austurlandi.

Annað kvöld nálgast skil frá lægð, sem nú er stödd við Nýfundnaland, landið. Þá bætir aftur í vind sunnan- og vestantil á landinu og fer að rigna. Á föstudag verður áttin suðvestlægari og þá kólnar smám saman með éljum þegar líður á daginn,“ segir í hugleiðingum veðurfræðings.

Veðurhorfur á landinu næstu daga

Á fimmtudag: Sunnan 5-10 m/s og víða dálitlar skúrir, en úrkomulítið á Austurlandi. Sunnan 8-15 og rigning sunnan- og vestanlands um kvöldið. Hiti 7 til 15 stig, hlýjast fyrir austan.

Á föstudag: Suðvestan 8-15 og skúrir, en bjart að mestu á Austurlandi. Kólnar með éljum seinnipartinn.

Á laugardag: Austlæg eða breytileg átt 3-10 og víða bjart með köflum, en stöku él fyrir norðan og fer að snjóa syðst á landinu síðdegis. Hiti 0 til 5 stig að deginum.

Á sunnudag (pálmasunnudagur): Norðaustan 8-15 og dálítil él eða snjókoma, en yfirleitt bjart á Vesturlandi. Frost 0 til 5 stig, en hiti 0 til 4 stig að deginum suðvestantil.

Á mánudag og þriðjudag: Útlit fyrir norðaustlæga átt með dálitlum éljum, en að mestu bjart sunnan heiða. Hiti breytist lítið.