„Ég er mjög mikill full­komnunar­sinni“

Valur hafði unnið fyrsta leikinn fyrir norðan og því ljóst að með sigri hér í kvöld myndi liðið styrkja stöðu sína til muna í einvíginu en það lið sem sigrar þrjá leiki fyrr fer áfram í undanúrslitin

„Þetta er risa sigur fyrir okkur. Eins og ég sagði fyrir leik þá er þetta mikilvægasti leikurinn í þessari viðureign og ég er mjög glaður að ná þessum sterka og örugga sigri hér heima. Stelpurnar gerðu þetta vel og héldu planinu út allar 40 mínútur leiksins.“ Sagði afar glaður Jamil strax að leik loknum.

Þegar Jamil er spurður út í hversu góð þessi frammistaða í kvöld hafi verið glottir hann og segir að liðið geti enn bætt sig mikið áður en hann gefur frammistöðu liðsins 7,5, eitthvað sem undirrituðum þykir full hörð einkunnagjöf eftir 27 stiga sigur.

„Ég er mjög mikill fullkomnunarsinni og vil meira. Ég vil meina að við þurfum enn að vinna hörðum höndum næstu vikur og mánuð. Það eru nokkrar stelpur í hópnum sem eigi mikið inni og þá getum við enn bætt þá hluti sem við erum að gera vel nú þegar svo ef ég ætti að gefa þessari frammistöðu einkunn þá myndi ég segja 7,5 af 10.“

Jamil heldur samt áfram og segir að hann sé virkilega ánægður á hvaða stigi liðið er á þessum tímapunkti á leiktíðinni.

„Mér þykir við vera að spila vel en held eins og ég sagði áðan að við eigum enn smá inni og getum bætt og breytt örfáum hlutum í okkar leik. Ég hef verið að segja það á síðustu vikum höfum við verið að æfa mjög vel á þessum tímapunkti leiktíðarinnar ásamt því að þá erum við að stefna í rétta átt.“

Næsti leikur fyrir norðan þar sem Valur getur tryggt farseðilinn í undanúrslitin. Hvernig leggst sá leikur í þig?

„Leikurinn og ferðalagið leggst vel í mig. Við viljum ekki þurfa að fara norður oftar en við þurfum og það var ákveðinn hvati með sigrinum hér í dag. Það verður auðvitað bara annar erfiður leikur sem við þurfum að fara inn í af varúð, án alls vanmats og virða verkefnið.“

Næsti leikur liðanna er fyrir norðan á miðvikudag klukkan 18:30.