Pérez rætt við nokkur lið um endur­komu

Mexíkóinn var látinn fara frá Red Bull eftir síðasta tímabil. Hann vann ekki neina keppni í fyrra og komst aðeins fjórum sinnum á verðlaunapall. Það var í fyrsta sinn síðan 2019 sem hann vann ekki eina einustu keppni á tímabili. 

„Nokkur lið hafa sett sig í samband við mig frá Abú Dabí,“ sagði Pérez og vísaði til síðustu keppni síðasta tímabils.

„Tímabilið er byrjað svo eitthvað mun opnast á næstu mánuðum. Þegar ég veit um alla kostina í stöðunni tek ég ákvörðun. Það er alveg ljóst að ég kem bara til baka ef verkefnið er gott og ég get notið þess.“

Auk Red Bull hefur hinn 35 ára Pérez ekið fyrir Sauber og McLaren á ferli sínum í Formúlu 1.

Eftirmaður Pérez hjá Red Bull, Liam Lawson, entist aðeins í tvær keppnir áður en honum var skipt út fyrir Yuki Tsunoda.

Pérez lenti í 2. sæti í keppni ökuþóra fyrir tveimur árum. Hann hefur unnið sex keppnir á Formúluferlinum.