Íslenski boltinn

Heim­sóttu Hásteinsvöll: „Það eru ekkert allir sáttir við þetta“

Ingvi Þór Sæmundsson skrifar
Baldur Sigurðsson og Þorlákur Árnason á Hásteinsvelli.
Baldur Sigurðsson og Þorlákur Árnason á Hásteinsvelli. stöð 2 sport

Verið er að leggja gervigras á Hásteinsvöll, heimavöll ÍBV. Þorlákur Árnason, þjálfari karlaliðsins, segir að margir sjái eftir náttúrulega grasinu.

Baldur Sigurðsson heimsótti Eyjar í þriðja þætti Lengsta undirbúningstímabils í heimi sem verður sýndur á Stöð 2 Sport klukkan 21:00 í kvöld.

Baldur fór meðal annars með Þorláki á Hásteinsvöll og ræddi við hann um breytingarnar á þessum sögufræga velli.

„Það eru ekkert allir sáttir við þetta. Það er náttúrulega ofboðslega miklar minningar sem tengjast þeim sem hafa fylgst með ÍBV í gegnum tíðina. Við vorum með Helgafellsvöllinn en grasið á þeim velli var aldrei gott. Þegar Hásteinsvöllur var bestur var hann svakalega góður. Það eru margir sem sjá á eftir náttúrulega grasinu hérna,“ sagði Þorlákur.

Klippa: Lengsta undirbúningstímabil í heimi - Breytingar á Hásteinsvelli

Vallarstæðið við Hásteinsvöll þykir eitt það fallegasta á byggðu bóli.

„Erlendu leikmennirnir þekkja þetta vallarstæði. Þetta er eitt af fallegustu vallarstæðum í heiminum. Þetta öskrar á mann,“ sagði Þorlákur.

ÍBV hefur leik í Bestu deildinni á Þórsvelli. Að sögn Þorláks er grasið þar fínt en setja þarf upp stúku og vallarklukku til að hægt verði að spila þar í Bestu deildinni.

Fyrsti heimaleikur ÍBV er gegn Fram 24. apríl.

Þriðji þáttur Lengsta undirbúningstímabils í heimi verður sýndur á Stöð 2 Sport klukkan 21:00 í kvöld.




Fleiri fréttir

Sjá meira


×