Lík­legast að næsta gos verði stærra en fyrri gos

Stærð mögulegs eldgoss ræðst af því hversu mikil kvika hleypur úr kvikuhólfinu þegar eldgos byrjar. Rúmmál kviku hefur aldrei verið meira eftir að goshrinan á Sundhnúksgígaröðinni hófst í desember 2023 og því telur Veðurstofan mögulegt að næsta gos verði stærra en fyrri gos að rúmmáli.

Samkvæmt tilkynningu Veðurstofunnar er talið líklegast að kvika myndi fyrst koma upp á svæðinu milli Sundhnúks og Stóra-Skógfells. Það hafi verið tilfellið í sex af þeim sjö gosum sem hafa orðið frá því að eldvirknin hófst í árslok 2023 með þó einni undantekningu í janúar 2024 þegar kvikan kom fyrst upp rétt suður af Hagafelli.

Skjálftavirkni hefur farið hægt vaxandi undanfarnar vikur.

„Vegna endurtekinna atburða á Sundhnúksgígaröðinni, þar sem kvikugangar og gossprungur hafa myndast, hefur spenna í jarðskorpunni minnkað með hverjum atburði. Það þýðir að sífellt færri og minni skjálftar mælast á svæðinu vikurnar og dagana fyrir gos en gerðu í aðdraganda fyrstu eldgosanna.“

Veðurstofan telur að eins og áður megi reikna með mjög stuttum fyrirvara áður en gýs. Í síðustu tveimur eldgosum hafi liðið um 30 til 40 mínútur frá því að fyrstu merki um skjálftahrinu sáust þangað til eldgos hófst.

Þau merki sem hafa sést þegar kvika leitar til yfirborðs eru áköf smáskjálftahrina á Sundhnúksgígaröðinni, þrýstingsbreytingar í borholum HS Orku í Svartsengi, aflögun á ljósleiðara og aflögun á yfirborði sem sést á rauntíma GPS-mælingum.

Samkvæmt tilkynningu er hættumat óbreytt og er í gildi til þriðjudags í næstu viku, 1. apríl.