„Að fá að gera þetta alla daga er draumur“

Andri Már skoraði sitt fyrsta landsliðsmark í fyrri leiknum í vikunni. Hann segir þar ákveðnu markmiði náð.

„Tilfinningin var mjög góð. Þetta er búið að vera á listanum að ná þessu marki. Það er gott að hafa náð því og er klár í meira,“ segir Andri sem ætlar sér að nýta tækifærið í liðinu. Töluvert margir eru frá vegna meiðsla.

„Maður verður að gera það. Auðvitað er leiðinlegt að það séu meiðsli og þetta eru stóru póstar sem eru frá. Samkeppnin er hörkugóð í þessu liði, en þegar svona tækifæri gefst þá verður maður að grípa það, þess vegna er maður í þessu,“ segir Andri.

Andri er leikmaður Leipzig í þýsku úrvalsdeildinni og leikur þar undir stjórn föður síns, fyrrum landsliðsmannsins Rúnars Sigtryggssonar. Vegna meiðsla hefur hlutverk hans stækkað, sem hann hefur nýtt vel og mikill uppgangur verið á hans leik á stóra sviðinu síðustu vikur.

„Þetta hefur verið smá upp og niður hjá liðinu en persónulega hef ég fengið að spila mikið. Við lentum í meiðslum sem gerði það að verkum að ég fékk margar mínútur og ég þarf að sýna að þessar mínútur eigi rétt á sér. Ég er læra helling og er að spila fyrir framan fullar hallir. Það er tröppugangur í þessu og maður á aldrei að stoppa,“ segir Andri.

Hann upplifi drauminn sem atvinnumaður í handbolta.

„Það er alls ekki hægt að kvarta yfir því að vakna og hugsa bara um handbolta. Að fá að gera þetta alla daga og spila fyrir framan tíu þúsund manns, er bara draumur,“ segir Andri.

Viðtalið má sjá í spilaranum að ofan.