Hörfa frá Kúrsk

Eftir umfangsmikla bardaga síðan þá hafa Rússar, með aðstoð hermanna frá Norður-Kóreu rekið Úkraínumenn hægt og rólega aftur á bak í héraðinu. Á síðustu vikum hefur staða Úkraínumanna þar versnað töluvert.

Nýverið komust Rússar nærri því að skera á birgðalínur úkraínskra hermanna í Kúrsk en þeir hörfuðu áður en þeir voru umkringdir. Í morgun hefur myndefni sýnt rússneska hermenn draga rússneska fánann að húni í bænum Sudzha í Kúrsk, sem hefur lengi verið helsta vígi Úkraínumanna þar. Áður höfðu Rússar sótt hratt fram annarsstaðar í héraðinu.

Rússneskir herbloggarar segja Úkraínumönnum hafa tekist að flytja sínar bestu sveitir á brott. Flestar byggðir sem Úkraínumenn hafi haldið í Kúrsk séu tómar, að undanskildum einhverjum hermönnum sem hafi orðið eftir.

Talið er að þessar reynslumestu sveitir hafi verið fluttar til austurhluta Úkraínu, þar sem staða Úkraínumanna hefur skánað nokkuð að undanförnu.

Vopnahléstillaga á borð Rússa

Ráðamenn í Úkraínu og í Bandaríkjunum tilkynntu í gær, eftir viðræður í Sádi-Arabíu, að erindrekar ríkjanna hefðu komist að samkomulagi um vopnahléstillögu. Sú tillaga snýst um þrjátíu daga vopnahlé Hún verður á næstunni lögð á borð ráðamanna í Rússlandi.

Donald Trump, forseti Bandaríkjanna, sagðist í gær ætla að ræða við Vladimír Pútín, forseta Rússlands, í vikunni.

„Boltinn er hjá þeim núna,“ sagði Marco Rubio, utanríkisráðherra Bandaríkjanna í gær.

Í kjölfarið opnuðu Bandaríkjamenn aftur á flæði hernaðaraðstoðar til Úkraínu og byrjuðu sömuleiðis aftur að deila upplýsingum eing og gervinhnattamyndum, hlerunum og annarskonar eftirlitsgögnum með Úkraínumönnum.

Vólódímír Selenskí, forseti Úkraínu, birti í gær ávarp þar sem ítrekaði að Úkraínumenn hefðu frá upphafi þessa stríðs leitast eftir friði. Þeir vildu gera allt til að tryggja frið, sem bjóði ekki upp á nýtt stríð í framtíðinni.

Fyrstu viðbrögð frá Rússlandi gefa þó til kynna að þar á bæ sé ekki mikill áhugi fyrir því að samþykkja vopnahléstillöguna. María Sakaróva, talskona utanríkisráðuneytis Rússlands, sagði í morgun að afstaða Rússlands myndi ekki ráðast af samþykktum annarra aðila en Rússa.

Rússneskir ráðamenn hafa ekki gefið til kynna að þeir hafi látið af kröfum sínum um að fá fjögur héruð Úkraínu, sem þeir stjórna ekki að fullu, auk Krímskaga, að Úkraína afvopnist, fái ekki inngöngu í NATO og jafnvel það að NATO hörfi alfarið frá Austur-Evrópu.

Dmitrí Peskóv, talsmaður Pútíns, sagði í morgun að nú væri beðið eftir skilaboðum frá Bandaríkjunum. Ekki væri hægt að taka ákvörðun fyrr en frekari upplýsingar hefðu borist.

Heimildarmenn Reuters í Kreml segja Pútín ólíklegan til að samþykkja vopnahlé að svo stöddu, eins og tillagana líti út í dag.