Ís­lenskar aug­lýsinga­stofur tróna á toppnum yfir stressaða starfs­menn

Þetta er meðal þess sem fram kemur í viðhorfskönnun EACA (European Association of Communications Agencies), regnhlífarsamtökum um 2.500 evrópskra auglýsingastofa. Samband íslenskra auglýsingastofa (SÍA) er fullgildur aðili að samtökunum.

Í tilkynningu frá SÍA segir að könnunin, sem náði til tæplega fjögur þúsund fagaðila, starfsmanna auglýsingastofa í 25 Evrópulöndum, sýni að íslenskar stofur séu með sterka sérstöðu:

• Fagleg ánægja og stolt starfsmanna er hátt og í takt við evrópskt meðaltal (70%)
• Bjartsýni íslenskra starfsmanna á framtíð greinarinnar er 80% sem er yfir evrópska meðaltalinu (70%).
• Íslenskt starfsfólk finnur fyrir mestri streitu allra þátttökuþjóða eða 80% en meðaltalið er 67%.
• Rekstrarhæfi/arðsemi stofa er skilgreind sem stærsta áskorunin fyrir 2025, jafnt á Íslandi sem og í Evrópu.

Haft er eftir Önnu Kristínu Kristjánsdóttur, formanni SÍA, að niðurstöðurnar gefi mikilvæga innsýn í stöðu íslenskra stofa. 

„Við sjáum að íslenskt fagfólk er metnaðarfullt og bjartsýnt, vinnustaðamenning er sterk, en hátt streitustig er áhyggjuefni sem við þurfum að takast á við. Það er áhugavert að sjá Ísland skora svona hátt á álagi og streitu, ekki síst þar sem við búum við styttri vinnuviku en flest ef ekki öll samanburðarlöndin. Á sama tíma helst stolt í starfi og bjartsýni á greinina hátt. Aðild okkar að EACA gefur okkur nú tækifæri til að læra af evrópskum systurfélögum um bestu leiðir til að styðja við starfsfólkið okkar og auka rekstrahæfi,“ segir Anna Kristín.

Innan SÍA í dag eru Brandenburg, ENNEMM, Hér&Nú, Hvíta húsið, Kontor, Peel og Pipar/TBWA.

Í tilkynningunni segir að aðild SÍA að EACA veiti íslenskum auglýsingastofum aðgang að evrópsku fagsamfélagi, þekkingu og tengslaneti sem spanni þrjátíu lönd og 120.000 fagaðila. Sem hluti af þessu samstarfi tóku íslenskar auglýsingastofur í fyrsta sinn þátt í árlegri viðhorfskönnun EACA, sem veiti einstaka innsýn í stöðu íslenska auglýsingamarkaðarins í evrópsku samhengi.