Um­ræðan væri önnur ef um Ras­h­ford væri að ræða en ekki Greal­ish

Grealish hefur ekki átt sjö dagana sæla undanfarið. Eftir að vera lykilmaður í liði Manchester City sem vann þrennuna tímabilið 2023-24 hefur þessi hæfileikaríki leikmaður ekki fundið sig.

Hann átti erfitt uppdráttar á síðustu leiktíð en stóð þó uppi sem Englandsmeistari fjórða árið í röð með Man City. Á yfirstandandi leiktíð hefur ekki staðið steinn yfir steini hjá félaginu sem gæti staðið uppi án titils í vor, eitthvað sem þekkist ekki þar á bæ. Ofan á það hefur Grealish spilað skelfilega, misst sæti sitt í liðinu svo ekki sé talað um sæti sitt í enska landsliðinu.

Það vakti því athygli þegar myndir af Grealish að sumbli birtust nýverið. Hann hafði þá skellt sér til Newcastle á frídegi sínum og hellt í sig áfengi þangað til hann gat vart gengið í beinni línu.

Lewis ræddi stöðu mála hjá Grealish og Rashford en taldi næsta víst að ef Rashford hefði verið myndaður við sömu iðju hefðu viðbrögðin ekki verið þau sömu.

„Stundum verðum við að tala af alvöru. Ef þetta væri Rashford að gera sömu hluti og við höfum séð Grealish gera … ef við hefðum séð Rashford ráfa niður götuna í átt að næsta bar þá væri búið að rústa honum.“

„Það er ákveðinn tvískinnungur í gangi þegar kemur að því hvernig við horfum á myndefni af þessu tagi. Ég er viss um að Grealish sé ánægður með að vera ekki Rashford í aðstæðum sem þessum. Við værum ekki að gæta jafnréttis ef við myndum ekki ræða stöðuna í málum sem þessum.“

„Hvað Jack varðar þá er hann magnaður leikmaður þegar hann er upp á sitt besta. Ég er viss um að hann vill gera hvað hann getur til að komast aftur inn í myndina hjá Thomas Tuchel, landsliðsþjálfara Englands.“

„Sem stendur eru hins vegar beittari, stöðugri og meira skapandi leikmenn á undan honum. Þetta snýst um hvað Jack vill gera frá deginum í dag. Vill hann komast aftur í liðið hjá City. Vill hann komast inn í enska landsliðið?“

Lewis sagði Jack vera elskaðan vegna þess hversu mannlegur og jarðbundinn hann er þrátt fyrir ótrúlegan árangur innan vallar undanfarin ár.

„Ég held að það sé enginn vilji til að rífa hann niður og gera lítið úr honum. Hann er magnaður leikmaður og við viljum sá hann aftur á þeim stalli sem hann var á. Það er alltaf leiðinlegt þegar leikmenn tapa flugi og við viljum öll sjá hann í hæstu hæðum á ný.“

Hinn 29 ára gamli Grealish hefur komið við sögu í 16 leikjum Man City í ensku úrvalsdeildinni á leiktíðinni og lagt upp eitt mark. Þá hefur hann skorað eitt mark í sex leikjum í Meistaradeild Evrópu ásamt því að skora eitt og leggja upp þrjú í þremur leikjum í ensku bikarkeppninni.