Þórdís lék með yngri flokkum FH og Breiðabliks og hóf meistaraflokksferilinn með Blikum fyrir fimmtán árum. Hún lék einnig með Stjörnunni, Þór/KA, KR og aftur með Breiðabliki áður en hún kom til Vals þar sem hún spilaði síðast. Þá hefur hún einnig leikið með Alta og Kristianstad í Svíþjóð og með Apollon á Kýpur.
Alls hefur Þórdís, sem er sóknarsinnaður miðjumaður, skorað þrjátíu mörk í 149 leikjum í efstu deild hér á landi. Hún skoraði til að mynda sjö mörk í deild og bikar árið 2022 þegar Valur varð bæði Íslands- og bikarmeistari.
Hún spilaði hins vegar ekkert árið 2023 eftir að hafa slitið krossband í hné en kom við sögu í samtals ellefu leikjum með bikarmeisturum Vals í fyrra.
Þórdís, sem er 31 árs gömul, á að baki 2 A-landsleiki og 29 leiki fyrir yngri landslið Íslands en í þeim skoraði hún sjö mörk.
„Þórdís er frábær fótboltamaður og er með töfra í fótunum, það er bara þannig. Við erum í skýjunum með að hafa fengið hana í hópinn okkar,“ segir John Andrews, þjálfari Víkinga, á vef félagsins.
„Við höfum þekkst lengi og hún er leikmaður sem ég hef alltaf dáðst að og borið virðingu fyrir. Það eru til nokkrar tegundir af leiðtogum og á sinn hátt er Þórdís frábært dæmi um leikmann sem setur gott fordæmi fyrir öll sem í kringum hana eru. Jákvæð orka hennar og baráttuvilji er smitandi og hún er strax búin að mynda sterk tengsl í hópnum,“ segir John.
