Viðskipti innlent

Airbus vottuð með hreyflum sem knýja þotur Icelandair

Kristján Már Unnarsson skrifar
A321 XLR tekur á loft knúin Pratt & Whitney-hreyflum.
A321 XLR tekur á loft knúin Pratt & Whitney-hreyflum. Airbus

Flugöryggisstofnun Evrópu, EASA, hefur gefið út tegundarskírteini fyrir Airbus A321 XLR-þotuna knúna Pratt & Whitney-hreyflum. Áður hafði stofnunin samþykkt flugvélina með CFM LEAP-hreyflum. Sú vottun fékkst fyrir sjö mánuðum, í júlímánuði 2024, og var forsenda þess að hægt yrði að taka þotuna í almenna notkun.

Fyrsta A321 XLR fór í fyrsta reynsluflug sitt í júní 2022. Spænska flugfélagið Iberia varð síðan fyrst til að taka XLR-þotuna í notkun til farþegaflugs á Leap-hreyflum þann 14. nóvember síðastliðinn. Samkvæmt tilkynningu Airbus hafa yfir fimmhundruð þotur af gerðinni A321 XLR verið pantaðar.

Spænska félagið Iberia varð fyrst til að taka XLR-gerðina í notkun í nóvember síðatliðnum. Flugvélar Iberia eru knúnar CFM Leap-hreyflum.Iberia

Sumarið 2023 samdi Icelandair við Airbus um kaup og kauprétt á allt að 25 þotum af gerðinni A321 XLR, sem forstjóri Icelandair lýsti sem einni stærstu ákvörðun í sögu félagsins. Icelandair valdi hreyfla frá Pratt & Whitney fyrir sinn flota.

Icelandair fær þó ekki fyrstu XLR-vélarnar afhentar fyrr en árið 2029. Fram að þeim tíma hyggst félagið reka Airbus A321 LR-þotur, sem teknar eru á leigu. Sú fyrsta var afhent félaginu í desember, sú næsta kom um síðustu helgi, sú þriðja er væntanleg fyrir lok þessa mánaðar og sú fjórða í næsta mánuði.

Hér má sjá frétt frá afhendingu fyrstu Airbus-þotu Icelandair í Hamborg:

Airbus Icelandair Fréttir af flugi

Tengdar fréttir

Önnur Airbus-þotan væntanleg á morgun

Önnur Airbus-þota Icelandair er væntanleg til Íslands á morgun frá verksmiðjunum í Hamborg. Áætlað er að hún lendi í Keflavík í hádeginu, um klukkan 12:30. Þotan fær nafnið Lómagnúpur og skrásetningarstafina TF-IAB.

Fagna þotunni sem markar tímamót í sögu Icelandair

Icelandair-menn fögnuðu tímamótum með komu fyrstu Airbus-þotu félagsins til landsins í dag og um leið því að fá farkost sem eyðir þrjátíu prósentum minna eldsneyti á hvert sæti en þotan sem hún leysir af hólmi.

Nýjasta þota Airbus í krefjandi prófunum í hvassviðri í Keflavík

Flugvélaframleiðandinn Airbus nýtti sér hvassviðrið á Íslandi í dag til flugprófana á nýjustu farþegaþotu sinni með því að lenda henni margsinnis í stífum hliðarvindi. Þetta er samskonar þota og ráðamenn Icelandair veðja á sem sína framtíðarvél.



Mest lesið


Fleiri fréttir

Sjá meira


×

Mest lesið