Með fimm­tán kíló af grasi í töskunni

Í dómi Héraðsdóms Reykjaness, sem kveðinn var upp þann 28. febrúar síðasliðinn en birtur í dag, segir að maðurinn hafi verið ákærður fyrir stórfellt fíkniefnalagabrot, með því að hafa laugardaginn 4. janúar 2025, staðið að innflutningi á samtals 15.025 grömmum af maríhúana ætluðu til söludreifingar hér á landi í ágóðaskyni.

Hann hafi flutt fíkniefnin til landsins, sem farþegi með flugi frá ótilgreindum stað, falin í farangurstösku sinni.

Maðurinn hafi mætt við þingfestingu málsins þann 27. febrúar og játað brot sín skýlaust og krafðist þess að honum yrði gerð vægasta refsing sem lög leyfa. Með játningu mannsins hafi verið farið með málið sem játningarmál og dómur lagður á það án frekar sönnunarfærslu.

Við ákvörðun refsingar hafi verið litið til þess að af rannsóknargögnum málsins yrði ekki séð að maðurinn hafi verið eigandi fíkniefnanna eða að hann hafi tekið þátt í skipulagningu á innflutningi þeirra til Íslands. Þáttur hans hafi einskorðast við að flytja efnin til landsins gegn greiðslu. Með öðrum orðum hafi hann verið svokallað burðardýr.

Refsing mannsins þætti hæfilega ákveðin fjórtán mánaða fangelsisvist, þar af skyldi fresta fullnustu ellefu mánaða refsingarinnar og sá hluti látinn niður falli haldi maðurinn almenn skilorð í þrjú ár.

Þá var manninum gert að greiða allan sakarkostnað, alls 1,2 milljónir króna. Þar af voru málsvarnarlaun skipaðs verjanda hans ein milljón króna.