Lyftu bikarnum fyrir framan þær en hafa síðan ekki unnið Val í þúsund daga

Fram og Valur mætast enn á ný í dag í undanúrslitum Powearde bikars kvenna þar sem sæti í bikarúrslitaleiknum er í boði.

Leikurinn hefst klukkan 18.00 á Ásvöllum og er fyrri leikur kvöldsins en í hinum, sem byrjar klukkan 20.15, berjast Grótta og Haukar um hitt sætið í bikarúrslitaleiknum.

Valskonur eru á toppnum en Framliðið er í öðru sæti. Þetta er því uppgjör tveggja efstu liða Olís deildar kvenna á meðan í hinum leiknum mætast liðin í þriðja sæti og neðsta sæti deildarinnar.

Valskonur hafa þegar unnið Fram tvívegis á þessu tímabili, bæði á heima- og útivelli. Þær hafa styrkt takið sitt enn frekar á þessari leiktíð.

Fram hefur nú spilað tíu leiki í röð á móti Val án þess að ná að fagna sigri. Liðið náði 20-20 jafntefli í leik liðanna í desember 2022 en Valskonur hafa unnið alla aðra leiki liðanna á síðustu þúsund dögum.

Sigurinn á Hlíðarenda í síðasta leik liðanna í janúar var sjöundi sigur Vals í röð á móti Fram. Einn af þeim er síðasti bikarleikur liðanna í febrúar 2022 sem Valur vann með sex mörkum.

Liðin mættust síðast á þessu stigi bikarkeppninnar árið 2022 þegar Fram og Valur léku til úrslita um bikarmeistaratititilinn. Valur vann þann leik 25-19. Síðasti undanúrslitaleikur þeirra fór fram árið á undan og þar fögnuðu Framkonur 22-19 sigri.