Samkvæmt vefnum DEX Screener, þar sem hægt er að fylgjast með gengi rafmynta, virðist Volcoino hafa verið sett á laggirnar 8. febrúar síðastliðinn. Myntin er tengd við aðra stærri rafmynt, sem ber heitið Solana, en til þess að kaupa í Volcoino þarf að notast við Solana.
Virði Volcoino hefur aldrei risið hátt. Hæst komst virðið stakrar Volcoino-myntar í réttrúman 0,0001 Bandaríkjadal, en tæplega 500 milljónir stakar Volcoino-myntir eru til. Þrátt fyrir það hafa kaup og sala á myntinni hlaupið á þúsundum Bandaríkjadala.
Svo virðist sem einn aðili, sem notast við nafnið y94vnc, hafi verið langduglegastur í viðskiptum með Volcoino, og þar er bæði átt við kaup og sölu. Stærsta staka færslan átti sér stað fyrir tveimur dögum þegar y94vnc seldi hlut hvers virði var 9,6 þúsund Bandaríkjadollarar. Síðan hefur gengið verið stöðugt en ansi lágt.
Tuttugu prósent sögð fara til Grindavíkur
Líkt og áður segir var því haldið fram á X að ágóði myndi renna til þeirra sem hafa komið illa út úr Grindavíkureldunum.
„Mun gefa 20% af ágóðanum til fórnarlambanna í Grindavík sem hafa misst heimili sín og lífibrauð í hræðilegum eldsumbrotum. Takk fyrir að styðja við þetta verkefni,“ sagði í færslu í nafni Volcoino. Reikningnum á X hefur nú verið eytt.
Ekkert liggur fyrir um hvort nokkuð hafi verið á bak við þessa fullyrðingu um að Grindvíkingar myndu græða á myntinni.
