Raf­myntar­for­stjóri játar sig sekan um að fé­fletta við­skipta­vini

Alríkissaksóknarar ákærðu Alex Mashinsky upphaflega fyrir fjársvik, samsæri og markaðsmisnotkun árið 2023, ári eftir að Celsius fór í þrot. Þeir sökuðu hann um að villa um fyrir viðskiptavinum til þess að fá þá til að fjárfesta í rafmynt fyrirtækisins og spenna upp verð rafmyntarinnar á fölskum forsendum.

Mashinsky neitaði upphaflega sök en gerði síðan sátt við saksóknara. Þegar hann kom fyrir dómara á þriðjudag játaði hann sig hins vegar sekan í tveimur ákæruliðum af sjö: sýndarviðskipti og markaðsmisnotkun til þess að hafa áhrif á gengi CEL-rafmyntar fyrirtækisins, að sögn Reuters-fréttastofunnar.

Fyrir dómi játaði Mashinsky meðal annars að hafa blekkt viðskiptavini Celsius með því að fullyrða ranglega í viðtali árið 2021 að fyrirtækið hefði fengið vottun frá eftirlitsaðilum fyrir fjárfestingaleið sína. Þá hefði hann heldur ekki greint frá því að hann hefði selt eigin CEL-rafmyntir.

Saksóknarar segja að Mashinsky hafi hagnast persónulega um 42 milljónir dollara, jafnvirðri tæpra sex milljarða íslenskra króna, á því að selja CEL-rafmyntir á uppsprengdu verði. Viðskiptavinir hans hafi aftur á móti setið í súpunni þegar fyrirtækið varð gjaldþrota.

„Ég veit að það sem ég gerði var rangt og ég vil gera hvað sem ég get til þess að bæta fyrir það,“ sagði fyrrverandi forstjórinn fyrir dómi.

Sáttin sem Mashinsky gerði felur það meðal annars í sér að hann fellst á að áfrýja ekki fangelsisdómi sem er þrjátíu ár eða skemmri. Þrjátíu ár eru hámarksrefsing sem liggur við brotunum tveimur sem hann játaði sig sekan um. Ákveða á refsingu hans í apríl.