Kennari stakk átta ára stúlku til bana

Stúlkan fannst særð á annarri hæð grunnskólans í borginni Daejeon um klukkan 18:00 að staðartíma í gær. Hennar hafði verið saknað frá því að rútubílstjóri lét vita af því að hún hefði ekki mætt til að vera sótt þá um daginn. Hún var úrskurðuð látin á sjúkrahúsi. 

Kennarinn, kona á fimmtugsaldri, var hjá stúlkunni og með stungusár sem lögregla telur að hún gæti hafa veitt sér sjálf, að sögn breska ríkisútvarpsins BBC.

Konan játaði að hafa stungið stúlkuna en yfirvöld segja að hún hafi ekki haft nein tengsl við stúlkuna. Yfirheyra átti konuna frekar eftir skurðaðgerð sem hún gekkst undir vegna sára sinna.

Tók annan kennara hálstaki skömmu áður

Kennarinn er sagður hafa óskað eftir sex mánaða leyfi vegna þunglyndis í desember og snúið aftur til starfa eftir aðeins tuttugu daga eftir að læknir mat hann tilbúinn til starfa.

Nokkrum dögum áður en konan stakk stúlkuna hafði hún sýnt af sér ofbeldisfulla hegðuna og meðal annars tekið samkennara sinn hálstaki. Tveir embættismenn skólayfirvalda heimsóttu skólann vegna þess að morgni árásarinnar og mæltu með því að konan yrði sett í leyfi og haldið aðskilinni frá öðrum kennurum. Henni hafði verið gert að sitja við borð aðstoðarskólastjórans til að hægt væri að hafa eftirlit með henni.

Choi Sang-mok, starfandi forseti Suður-Kóreu, hvatti yfirvöld til að grípa til allra mögulegra ráða til þess að koma í veg fyrir sér að atburður af þessu tagi geti endurtekið sig.