Á­kvörðun Einars eins og þruma úr heið­skíru lofti

„Ekkert í samstarfinu gaf tilefni til þessa, engar kröfur eða samtöl hafa farið fram innan meirihlutans um mikilvægi þess að breyta um kúrs fram að þessu. Ákvörðun Einars er vonbrigði enda var meirihlutasamstarfið farsælt og mörg mikilvæg verkefni í fullum gangi þar sem við vinnum að heilum hug fyrir hag borgarbúa. Óvissa um stefnu og rekstur Reykjavíkurborgar er hættuspil sem og kúvendingar í mikilvægum málaflokkum þegar svo langt er liðið á kjörtímabilið,“ segir Heiða Björg í tilkynningu á Facebook-síðu sinni fyrir stuttu.

Einar kallaði oddvita á fund í gærkvöldi og tilkynnti að hann ætlaði að slíta samstarfi. Fram kom í fréttum í gær að Framsóknarflokkur, Sjálfstæðisflokkur, Flokkur fólksing og Viðreisn hafi hafið meirihlutaviðræður. Ekki liggur fyrir hvar eða hvenær verður fundað í dag en formlegar viðræður eru hafnar. 

Heiða Björg segist ekki trúa því að meirihluti borgarfulltrúa muni blessa þessa „hönnuðu atburðarás sem nú er hafin og virðist hafa það helst að markmiði að koma Sjálfstæðisflokknum til valda á ný.“

Hún segir borgarfulltrúa Samfylkingarinnar halda sínu striki. „Borgin okkar á betra skilið,“ segir hún að lokum.

Atburðarásin lykti af óheilindum

Skúli Helgason borgarfulltrúi Samfylkingar tekur í sama streng í færslu á Facebook.

„Ákvörðun Einars Þorsteinssonar oddvita Framsóknar um að slíta meirihlutanum í borginni kom mjög á óvart enda hefur samstarfið verið í öllum meginatriðum gott. Vissulega hafa verið mismunandi skoðanir innan hans um flugvallarmál en þau hafa skipt fólki í andstæðar fylkingar milli flokka og innan flokka alla þessa öld svo það átti ekki að koma neinum á óvart,“ segir Skúli.

Hann segir atburðarásina lykta af óheilindum.

„…og slíkt er aldrei vænlegur fylgifiskur í stjórnmálum. Við í Samfylkingunni munum áfram einbeita okkur að því sem skiptir mestu fyrir hag borgarbúa þar sem húsnæðisuppbygging, fjölbreyttar samgöngur, menntun, menning og velferð eru í forgangi,“ segir hann að lokum.