Geð­veikt fjör á Bessa­stöðum

„Það var ánægjulegt að setjast niður með Höllu forseta þar sem hún gaf okkur góðan tíma í alvöru samtal um geðheilbrigðismál frá víðu sjónarhorni,“ segir Svava. „Við ræddum meðal annars um áhrif tækninnar á geðheilsuna og hvernig við getum komið með mótvægi við þjáningunni sem kom bersýnilega í ljós síðasta sumar og haust. Við vorum sammála um það að við viljum stuðla að breyttri menningu sem hlúir að geðheilsu landsmanna og gerir okkur kleift að lifa góðu lífi í gefandi tengslum.“

G-vítamín er árlegt 30 daga geðræktarátaki sem Geðhjálp stendur fyrir og hefst alltaf á bóndadegi, fyrsta degi í þorra.

„Við í Geðhjálp teljum ástæðu til að auka umræðu um allt það sem hægt er að grípa til í svartasta skammdeginu svo að við náum að þreyja þorrann með ágætis geðheilsu í farteskinu. Halla forseti deildi með okkur sínum G-vítamínum, eða dæmum um það sem hún nýtir til að rækta geðheilsu sína. Hún nefndi til að mynda gleði og húmor“, sagði Svava og sýndi upptöku þar sem Halla forseti sagði:

„Mitt G-vítamín er gleði. Ég vel þegar ég vakna á morgnana, gleði á aðra öxlina og hugrekki á hina, og mér finnst þetta skipta máli, með hvaða geði ég fer út í daginn. En svo er auðvitað hægt að rækta gleðina með ýmsum hætti, bros er til dæmis eitthvað sem getur lýst upp daginn fyrir sjálfan þig sem og aðra. Að umkringja þig fólki sem hefur húmor og setur gleðina á oddinn auðveldar manni að vinna sig í gegnum erfið verkefni, hvort sem það er manns eigið geð eða bara einhver krefjandi verkefni í vinnunni.“

Hér má horfa á Höllu Tómasdóttur, forseta Íslands, segja frá sínu G-vítamíni:

Á næstu 30 dögum munu birtast hér á Vísi greinar sem fjalla um átakið, auk þess sem eitt G-vítamín mun birtast á forsíðunni á Vísi daglega meðan átakið stendur yfir. Einnig munu útvarpsstöðvarnar Bylgjan, FM957 og X977 vekja athygli á átakinu, fjalla um G vítamín dagsins og fjalla almennt um geðheilbrigði.

Í ár selur félagið dagatal með svokölluðum G vítamínskömmtum sem eru ráðleggingar sem er ætlað að bæta geðheilsu. Í völdum dagatölum leynast svo geðræktandi vinningar.

G-vítamín dagatalið kostar 2.900 kr. og er hægt að kaupa það á vef Geðhjálparog í völdum verslunum Krónunnar. Allur ágóði þess rennur í Styrktarsjóð geðheilbrigðis en tilgangur sjóðsins er að stuðla að framförum í geðheilbrigðismálum með því að veita styrki til verkefna sem geta bætt geðheilbrigði landsmanna og auka skilning á geðheilsu og geðrænum vanda.