Aktivistahópurinn Öfgar er hættur

Í tilkynningunni segja þær að það sé alltaf erfið ákvörðun að kveðja það sem maður hefur lagt líf, sál og heilsu í.

„Sagan segir okkur þó að þegar samfélagið þarf á því að halda að þá verður til nýtt feminískt afl. Við erum stoltar af okkar framlagi og við erum þakklátar fyrir allan þann stuðning og traust sem okkur var úthlutað,“ segir í tilkynningunni.

Sjá einnig: Full­orðið fólk megi stunda sam­ræði við börn en börnin ekki skoða klám­blað

Þær segja ferðalagið hlaðið tilfinningu, erfiðleikum, gleði, sigrum og stundum sorg.

Minna á að hafa gaman

„Við viljum minna framtíðina á að gleyma ekki að hafa gaman, muna að fagna öllum þeim sigrum sem þið áorkið og ekki missa sjónar af því að við erum saman í liði hvort sem við vinnum saman í samtökum eða sem einstaklingar,“ minna þær á.

Að lokum kemur fram að þeir fjármunir sem félagið átti hafi runnið til Rótarinnar og Kvennaathvarfsins.

Ásakanir gegn knattspyrnumönnum

Aktivistahópurinn var mjög áberandi í kringum til dæmis ásakanir gegn landsliðsmönnum í knattspyrnu um ofbeldi árið 2021 og þegar fjallað var um ásakanir gegn Ingólfi Þórarinssyni tónlistarmanni, sem jafnan er þekktur sem Ingó veðurguð.

Sjá einnig: Öfgar segja Ingó hafa sak­bent sjálfan sig

Þær hafa einnig barist fyrir breytingum á lögum um samræðisaldur, gegn brottvísun mansalsþolenda og gegn nauðgunarmenningu.

9. október síðastliðin héldu þær, í samvinnu við Hagsmunasamtök brotaþola, kertavöku til minningar um konur sem hafa látið lífið vegna afleiðinga kynbundins ofbeldis.

Hópurinn hélt einnig úti hlaðvarpi um tíma þar sem þær ræddu við þolendur, sérfræðinga og um hin ýmsu feminísku málefni.

Sjá einnig: Öfgar höfnuðu samstarfi við Róbert Wessman

Segja þær sannar hetjur

Fjölmargir skrifa athugasemd við tilkynninguna eins og Steinunn Gyðu- og Guðjónsdóttir sem var talskona Stígamóta en starfar nú hjá Aton, Helgi Ómarsson ljósmyndari og áhrifavaldur en hann hefur oft beitt sér í þágu þolenda, Guðný Bjarnadóttir formaður Hagsmunasamtaka þolenda og margir fleiri.

„Takk fyrir ykkar óeigingjarna og mikilvæga starf… Þið eruð sannar hetjur sem að þúsundir þolenda þakka fyrir að segja upphátt það sem flestir fela í hljóði,“ segir Gísli Rafn Ólafsson fyrrverandi þingmaður Pírata og að samstarfið með þeim hafi verið eitt það merkasta á hans ferli.

Stella Samúelsdóttir, framkvæmdastýra UN Women, tekur í sama streng. „Takk fyrir alla ykkar baráttu og sigra. Þið eruð magnaðar.“

Sjá einnig: Hvetja fólk til að yfir­gefa brekkuna á mið­nætti

Fríða Rós Valdimarsdóttir fyrrverandi formaður Kvenréttindafélagsins segir: „Takk fyrir baráttu ykkar. Þið skrifuðuð ykkur all rækilega í sögubækurnar.“