Hver tekur við af Bjarna? Þetta eru nöfnin sem oftast eru nefnd

Formannskjör fer fram á landsfundi Sjálfstæðisflokksins sem áætlanir gera ráð fyrir að fari fram í febrúar næstkomandi. Hins vegar hefur verið uppi opinber orðrómur um að til greina komi að fresta landsfundi og enn sem komið er óljóst hvernig það fer. Eitt er víst að ekki eru allir á sama máli um það hvort fresta skuli landsfundi eða ekki.

Allir úr ráðherrahópi flokksins verið nefndir

Fjórir ráðherrar úr ríkisstjórn Bjarna sem lét af störfum fyrir jól hafa verið orðaðir við formannsframboð. Þá hafa nokkrir aðrir úr þingliðinu verið nefndir til sögunnar.

Varaformaðurinn Þórdís Kolbrún R. Gylfadóttir sagðist í samtali við fréttastofu í dag ekki vilja ræða mögulegt formannsframboð að svo stöddu. Dagurinn í dag eigi að hennar mati fremur að snúast um ákvörðun Bjarna um að láta gott heita en Þórdís hefur ítrekað sagst tilbúin til að taka við forystu í flokknum ef til þess kæmi.

„Ég hef alveg verið opin með það í töluverðan tíma að ég væri tilbúin að leiða Sjálfstæðisflokkinn inn í framtíðina. Það er svo sem óbreytt,“ sagði Þórdís í samtali við Vísi fyrr í dag.

Áslaug Arna Sigurbjörnsdóttir hefur einnig verið sterklega orðuð við formannsframboð. Hún hefur að undanförnu þótt dugleg við að rækta bakland sitt í flokknum, hefur haldið viðburði og fundi, skrifað greinar og svo mætti áfram telja. Áslaug hefur ekki gefið færi á viðtali í dag en í færslu á Facebook segir hún ákvörðun Bjarna vera stórtíðindi. „Frá því ég steig mín fyrstu skref í Sjálfstæðisflokknum hefur Bjarni verið mér mikilvægur félagi, vinur og leiðtogi. Hann treysti mér fyrir stórum verkefnum og tækifærum og fyrir það verð ég alltaf þakklát,” skrifar Áslaug meðal annars.

Áslaug hefur verið þingmaður Sjálfstæðisflokksins frá 2016 og hefur áður gegnt hlutverki í forystu flokksins en hún var ritari flokksins frá 2015 þar til hún tók fyrst við ráðherraembætti árið 2019.

Guðlaugur Þór Þórðarson hefur sýnt áhuga á formannsembættinu í verki en hann laut í lægra haldi í formannskjöri gegn Bjarna á síðasta landsfundi flokksins árið 2022. Guðlaugur Þór á marga stuðningsmenn innan flokksins en hann sækir ákveðið kjarnafylgi til annarra hópa innan flokksins en þær Áslaug og Þórdís, sem segja má að njóti báðar meiri stuðnings meðal stuðningsfólks Bjarna. Guðlaugur Þór og Áslaug Arna hafa jafnframt mæst í hörðum innanflokksslag í prófkjörsbaráttu í Reykjavík fyrir alþingiskosningarnar 2021.

Í færslu á Facebook í dag gefur Guðlaugur Þór ekkert upp um það hvort hann ætli að gefa kost á sér á næsta landsfundi. Hann hins vegar hrósar Bjarna, sem hann segir vera „einn öflugasti forystumaður þjóðarinnar á okkar tímum“ fyrir sín störf. Bjarni sé „skemmtilegur félagi og hrókur alls fagnaðar.“

Í viðtali við Vísi fyrr í dag vildi Guðlaugur ekkert gefa upp um það hvort hann ætli að bjóða sig fram til formanns. Hann segist þó hugsa um það og að fólk hafi komið að máli við sig.

Guðrún Hafsteinsdóttir oddviti flokksins í Suðurkjördæmi er sú úr fyrrverandi ráðherraliði flokksins sem hefur hvað stysta reynslu af þingstörfum. Hún hefur engu að síður verið orðuð við framboð og líkt og aðrir fyrrverandi ráðherrar í þingliði flokksins hefur Guðrún ekki útilokað neitt í þeim efnum. Hún hefur ekki svarað símtölum fréttastofu til þessa í dag.

Aðrir þingmenn koma einnig til greina

Ekki þykir heldur útilokað að aðrir þingmenn flokksins gefi kost á sér til forystu. Þar hefur nýkjörinn þingmaður flokksins úr Norðausturkjördæmi, Jens Garðar Helgason, einna helst verið orðaður við formannsembættið. Ólíkt þeim sem hér á undan hafa verið nefndir hefur Jens Garðar ekki gegnt þingmennsku áður en hann hefur í áratugi verið virkur í innra starfi og grasrót flokksins. Hvoru tveggja telja sumir vera kost fyrir nýjan formannskost, einkum þeir sem vilja sjá meiri endurnýjun í forystunni. Jens Garðar hefur ekki svarað símtölum fréttastofu í dag.

Sú ákvörun Bjarna að hætta ekki aðeins sem formaður heldur einnig á þingi hefur það í för með sér að fyrsti varamaður á lista í Suðvesturkjördæmi, Jón Gunnarsson, tryggir sér sæti á Alþingi en hann náði ekki kjöri í kosningunum í nóvember. Jón, sem hefur áður gegnt ráðherraembættum fyrir flokkinn, sagði við Vísi í dag að hann hyggist taka þingsætið og útilokaði sjálfur ekki heldur að gefa kost á sér til formanns. Hann hafi þó ekki leitt hugann að því.

Hildur Sverrisdóttir þingflokksformaður hefur ekki sýnt formannsembætti áhuga opinberlega en hún þykir hafa staðið sig með prýði í hlutverki þingflokksformanns. Hildur sagði í samtali við fréttastofu í dag að þingflokknum hafi verið brugðið þegar Bjarni tilkynnti um ákvörðun sína í morgun. „Þetta var um margt sorgleg stund,“ sagði Hildur sem segist ekki íhuga formannsframboð að svo stöddu.

Meðal annarra þingmanna flokksins sem komast á blað hjá veðmálafyrirtækinu Epicbet yfir hugsanlega formenn eru Ólafur Adolfsson, nýkjörinn þingmaður flokksins og oddviti í Norðvesturkjördæmi og Reykjavíkurþingmaðurinn Diljá Mist Einarsdóttir. Stuðlarnir á þau tvö eru þó öllu lægri eins og stendur en á fyrrverandi ráðherra flokksins. 

Reynsluboltar utan þingmannahópsins

Nokkur nöfn hafa einnig borist í tal sem ekki tilheyra núverandi þingflokki Sjálfstæðisflokksins. Ber þar einna helst að nefna bæjarstjórana í Kópavogi og í Ölfusi, Elliða Vignisson og Ásdísi Kristjánsdóttur.

Elliði sagðist í samtali við Vísi í dag aldrei hafa gefið kost á sér til forystu í flokknum og hann hafi ekki haft hug á því til þessa. Hann sagði hins vegar að nú væru mikil tækifæri framundan fyrir flokkinn og hann muni leggja sitt af mörkum. Hann var hins vegar nokkuð óræður í svörum um það hvort formannsframboð komi til greina.

Ásdís Kristjánsdóttir, bæjarstjóri í Kópavogi, hefur oft verið nefnd í þessu samhengi en hún hefur til þessa ekki sagst vera að íhuga formannsframboð. Ekki hefur hins vegar náðst í Ásdísi í síma í dag og óvíst að svo stöddu hvort ákvörðun Bjarna hafi orðið til þess að hún íhugi framboð.

Aðrir sem einnig hafa verið nefndir til sögunnar eru Halldór Benjamín Þorbergsson, forseti fasteignafélagsins Heima og fyrrverandi framkvæmdastjóri Samtaka atvinnulífsins, Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi og Stefán Einar Stefánsson blaðamaður á Morgunblaðinu og mbl.is.

Þótt hér hafi verið rakin nokkur þeirra nafna sem helst hafa verið nefnd í umræðunni um hugsanlega arftaka Bjarna Benediktssonar er ekki útilokað að fleiri komi til sögunnar þegar fram líða stundir og mun fréttastofan halda áfram að fylgjast með nýjum vendingum í hugsanlegu formannskapphlaupi sem framundan er í Sjálfstæðisflokknum.