Mögnum markþjálfun til fram­tíðar

Mikil vitundarvakning hefur átt sér stað undanfarin ár í íslensku atvinnulífi um mikilvægi markþjálfunar til þess að styðja við stjórnendur og starfsfólk og auka velsæld og árangur innan fyrirtækja. Í árdaga var hún fyrst og fremst nýtt fyrir stjórnendur og ákvarðanatökuaðila en með aukinni vitund, rannsóknum og skilningi á ávinningi markþjálfunar er hún nú nýtt á flestum sviðum samfélagsins og í fyrirtækjum og stofnunum af öllum stærðum og gerðum.

Fyrir hverja er markþjálfun?

Mörg íslensk fyrirtæki hafa starfandi markþjálfa innanhúss og önnur styrkja stjórnendur og starfsfólk til þess að leita til markþjálfa að eigin vali utanhúss. Undanfarið hafa fjölmargir stjórnendur einnig unnið markvisst að því að innleiða markþjálfunarmenningu í sínar skipulagsheildir en slíkar aðgerðir hafa skilað mælanlegum árangri, aukið framleiðni starfsfólks, dregið úr starfsmannaveltu, bætt starfsánægju og helgun starfsfólks.

International Coaching Federation (ICF) eru stærstu og virtustu samtök markþjálfa á heimsvísu. Í alþjóðlegri rannsókn sem ICF stóð fyrir töldu svarendur upp helstu ástæður þess að þau hugleiddu að sækja sér markþjálfun. Flest höfðu væntingar um að markþjálfun gæti hámarkað möguleika þeirra, aukið viðskipti, ýtt undir starfsframa eða hjálpað þeim að átta sig á styrkleikum sínum og veikleikum.

Hvað er markþjálfun?

Markþjálfun er þroskandi og skemmtilegt lærdómsferli sem miðar að því að aðstoða einstaklinga við að ná betri árangri í lífi og starfi. Markþjálfinn skorar á, veitir aðstoð við að fá skýra sýn, finna tilgang, víkka sjóndeildarhringinn, forgangsraða, koma auga á lausnir og setja niður skref í átt að aðgerðum.

Aðferðafræði markþjálfunar byggir á því að markþjálfinn skapar markþeganum öruggt rými til sjálfsskoðunar þar sem traust og virðing ríkja. Markþjálfinn spyr krefjandi og kröftugra spurninga og beitir virkri hlustun til þess að ekki aðeins heyra það sem markþeginn segir, heldur einnig skilja það sem hann raunverulega meinar og átta sig á því hvað liggur þar að baki.

Markþjálfun er stöðugt ferðalag innávið og eftir því sem ferðalaginu vindur fram uppgötvar markþeginn sífellt meira um sig, sín viðhorf, hugsanir, tilfinningar og þrár.

Fagmennska og gæði skipta máli

Faglegur markþjálfi ber hag markþegans fyrir brjósti og starfar af fullum heilindum að því að hann nái markmiðum sínum og fái sem mest út úr samvinnunni. Markþjálfun miðar að því að markþeginn finni sjálfur svörin og lausnirnar, enda er hann þá líklegastur til að framkvæma.

Það má því ramma þetta inn í gildi Félags markþjálfa á Íslandi sem eru: kjarkur, styrkur og árangur. Hafi markþeginn kjark til að horfast í augu við sjálfan sig og áskoranir sínar, langanir og þrár, þá fær hann styrk frá markþjálfanum sínum til að finna leiðir til að vinna með áskoranirnar, leiðir til breyta löngunum og þrám í veruleika og ná árangri. Oft veit markþegi ekki hvers hann er megnugur og uppgötvar því „nýjar víddir“ sem hann óraði ekki fyrir að ná eða vissi ekki að hann langaði að ná. Faglegir markþjálfar innan ICF starfa samkvæmt ströngum siðareglum og þurfa að uppfylla ákveðin hæfniviðmið.

Fagfélag íslenskra markþjálfa

ICF Iceland er fagfélag þeirra sem starfa við markþjálfun á Íslandi og hafa lokið minnst 60 kennslustunda viðurkenndu markþjálfanámi samkvæmt alþjóðlegum stöðlum og einnig reynslumeiri markþjálfa sem hlotið hafa ACC, PCC og MCC alþjóðagæðavottun á færni sína og fagvitund.

Tilgangur félagsins er að efla markþjálfun sem faggrein á Íslandi og stuðla að metnaði og fagmennsku innan greinarinnar. Starf félagsins miðar að því að fræða félagsmenn sína, efla samstarf innan fagsins og mynda kröftug tengsl markþjálfa innanlands sem erlendis.

Markþjálfunardagurinn 2025

ICF Iceland stendur fyrir Markþjálfunardeginum 2025 sem er ráðstefna um markþjálfun og jafnframt stærsti faglegi viðburður landsins um aðferðafræðina. Yfirskrift ráðstefnunnar er Mögnum markþjálfun til framtíðar og verður hún haldin 7. febrúar Hilton Reykjavík Nordica.

Markþjálfunardagurinn hefur fest sig í sessi sem einn af áhugaverðustu og eftirtektarverðustu viðburðum landsins fyrir markþjálfa, mannauðsfólk, kennara og stjórnendur til þess að eflast í sínu fagi og dýpka þekkingu og færni.

Markþjálfunardagurinn 2025 er skreyttur erlendum stjórstjörnum úr heimi markþjálfunar og innlendum markþjálfum sem nýta aðferðir markþjálfunar til að skapa magnaða framtíðarsýn. Ráðstefnan varpar kastljósinu að markþjálfun í sinni breiðustu mynd og hvernig markþjálfar og atvinnulífið geta magnað markþjálfun til framtíðar og nýtt aðferðafræðina til að auka vöxt og vellíðan sína, sinna skjólstæðinga, starfsfólks og stjórnenda.

Höfundur er markþjálfi og formaður ICF Iceland - fagfélags markþjálfa á Íslandi.