Albert Guðmundsson kom inn á sem varamaður þegar Fiorentina vann Cagliari, 1-0, í ítölsku úrvalsdeildinni í dag. Þetta var áttundi deildarsigur Fiorentina í röð.
Albert sneri aftur á völlinn í bikarleik gegn Empoli eftir nokkurra vikna fjarveru vegna meiðsla.
Landsliðsmaðurinn kom aftur inn á sem varamaður í leiknum gegn Cagliari en hann spilaði síðustu 23 mínúturnar.
Aðeins eitt mark var skorað í leiknum en það gerði Danilo Cataldi á 24. mínútu.
Vörn Fiorentina var þétt eins og hún hefur verið að undanförnu en liðið hefur aðeins fengið á sig eitt mark í síðustu fimm deildarleikjum.
Fiorentina er í 4. sæti ítölsku úrvalsdeildarinnar með 31 stig, þremur stigum á eftir toppliði Atalanta. Albert og félagar eiga þó leik til góða en leikur þeirra gegn Inter um síðustu helgi var blásinn af eftir að Edoardo Bove hné niður.
