Van Nistelrooy sár yfir því að hafa verið látinn fara frá United

Van Nistelrooy var ráðinn aðstoðarmaður Eriks ten Hag hjá United í sumar. Þegar Ten Hag var rekinn tók Van Nistelrooy tímabundið við Rauðu djöflunum og stýrði þeim í fjórum leikjum. Þrír þeirra unnust og einn endaði með jafntefli.

Þrátt fyrir það ákvað Amorim ekki að halda Van Nistelrooy í þjálfarateyminu og Hollendingurinn yfirgaf því United.

„Þegar ég tók við sem bráðabirgðastjóri sagði ég að ég væri hérna til að hjálpa United og vera áfram til að hjálpa félaginu og ég meinti það. Svo ég var mjög vonsvikinn og það var sárt að þurfa að fara,“ sagði Van Nistelrooy.

„Á endanum sætti ég við það því ég skil líka nýja stjórann. Ég hef verið lengi í fótboltanum og verið stjóri sjálfur. Ég skil þetta. Ég ræddi við Rúben um þetta. Ég er þakklátur fyrir samtalið, maður á mann, stjóri á stjóra. Það hjálpaði mér að halda áfram og ræða um nýja möguleika sem gladdi mig.“

Van Nistelrooy var ekki lengi atvinnulaus því hann var á dögunum ráðinn stjóri Leicester City. Hann stýrir liðinu í fyrsta sinn þegar það tekur á móti West Ham United í kvöld. Leicester er í 16. sæti ensku úrvalsdeildarinnar með tíu stig eftir þrettán leiki, einu stigi frá fallsæti.