Hvernig hætti ég að feika það?

Þú ert ekki ein um að gera þér upp fullnægingu í kynlífi en í nýlegri rannsókn kom í ljós að 61,9% kvenna létu eins og þær hafi fengið fullnægingu í kynlífi þegar þær í raun fengu það ekki!

Þegar við skoðum rannsóknir á fullnægingum kemur í ljós ákveðin gjá er á milli karla og kvenna þegar það kemur að því að fá fullnægingu í kynlífi. Þau sem eru áhugasömum geta slegið inn leitarorðin orgasm gap og lesið sig meira til. Þegar gagnkynja pör eru spurð út í það hvort þau hafi fengið fullnægingu síðast þegar þau stunduðu kynlíf kemur í ljós að 95% karla höfðu fengið fullnægingu á móti 65% kvenna (niðurstöður fyrir önnur kyn voru ekki skoðuð í þessari rannsókn).

En snúum okkur aftur að spurningunni. Það er ótrúlega skiljanlegt að vilja ekki særa tilfinningar makans og mörg tengja við það að finna fyrir ákveðinni pressu að kynlíf endi með fullnægingu. Mér finnst mikilvægt að minna á að kynlíf þarf alls ekki að enda með fullnægingu. Kynlíf á fyrst og fremst að snúast um unað! 

Á meðan þú heldur áfram að láta eins og þú sért að fá fullnægingu breytist ekki neitt. Þú hefur reynt að leiðbeina honum en það hljómar eins og þú þurfir að vera heiðarlegri við hann. Vissulega er gott að nálgast samtalið af nærgætni en fyrir flest pör þá leiða samtöl þar sem við berskjöldum okkur yfirleitt til dýpri tengingar og betra kynlífs!

Nokkrir punktar til að hafa í huga í þessu samtali:

• Það er alltaf gott að byrja á því að tala um það sem þú ert ánægð með. Þegar þú skoðar sambandið, kynlífið og nándina ykkar: Hvað er gott? Hvað er að virka vel fyrir þig?
• Það er í góðu lagi að útskýra að þér finnist erfitt að ræða þetta við hann. Sért hrædd um að særa hann en þér þyki mikilvægara að geta rætt við hann um þína líðan og það sem kemur upp í ykkar sambandi.
• Útskýrðu fyrir honum að þú þurfir öðruvísi/meiri örvun á snípinn eða lengri munnmök eða hvað það er sem þú telur þig þurfa frá honum til að geta fengið fullnægingu með honum. En hér er gott að muna að forleikurinn hefst löööngu áður. Hvernig eru þið að byggja upp spennu og tilhlökkun fyrir kynlíf? Hvað kveikir í þér yfir daginn? Rétt fyrir kynlífið og á meðan?
• Ábyrgðin er ekki bara hans eða þín. Þessar aðstæður koma upp þegar okkur langar ekki til að særa maka og náum ekki að miðla nægilega vel hvað það er sem við viljum. Hann á líka hluta af ábyrgðinni sem tengist því að hlusta og fylgja þínum leiðbeiningum.
• Þetta gæti verið góður tími til að tala aðeins um kynlífið ykkar og þess sem þið hlakkið til að upplifa saman. Aldrei slæmt að enda samtalið á góðum nótum!

Ég hvet fólk alltaf til að reyna að tala saman og eiga heiðarleg samtöl um kynlíf, þarfir og langanir. En ég skil að það er ekki eitthvað sem öll treysta sér í. Lúmskari leið væri þá að halda áfram að leiðbeina í kynlífi og minna hann á þegar hann hættir að gera það sem þú hefur beðið hann um. 

Þú gætir talað um það fyrir kynlíf hversu gott þér þykir það þegar hann gerir akkúrat það sem þú vilt fá meira af! Síðan má alltaf bjóða upp á sýnikennslu og fróa þér fyrir framan hann - bæði hægt að stilla því upp sem skemmtilegri tilbreytingu en í leiðinni getur þú sýnt hvernig þú færð fullnægingu með þér!

Ávinningurinn er mikill. Þegar þú hættir að þykjast fá fullnægingu og byrjar að setja fókus á þinn unað verður kynlífið betra! Þú nýtur þess meira og það er mikið frelsi að geta látið vita ef það koma dagar/skipti þar sem þú finnur að þú ert bara ekki að fara að fá það. Hversu frelsandi er að geta þá sagt „ég finn að ég er ekki að fara að fá það núna en ég vil halda áfram að njóta!” Minni pressa og meiri unaður!

Gangi þér vel <3