70 þúsund manns voru saman komin á heimavelli Dallas Cowboys til að sjá bardagann. Netflix sýndi beint frá viðburðinum sem er á meðal stærri hnefaleikaviðburða sögunnar.
Upphitunarbardagar fyrir þann stóra milli Paul og Tyson hófust klukkan eitt í nótt en strax þá fundu einhverjir fyrir hökti eða slökum gæðum í útsendingu streymisveitunnar.
Margur ætlaði sér að stilla inn í morgunsárið þegar kom loks að aðalbardaganum um klukkan fimm en lentu í vandræðum. Netþjónar Netflix virðast hreinlega ekki hafa ráðið við álagið og margir sem sátu eftir með sárt ennið og gátu ekki séð bardagann.
Takk Netflix pic.twitter.com/TCL6jmv1ln
— Henry Birgir (@henrybirgir) November 16, 2024
Tyson var þá kokhraustur í viðtali áður en látalætin hófust þegar hann var tekinn tali í búningsherbergi sínu. Hann sagðist ætla að vinna grimmilegan sigur áður en hann sneri sér við og rasskinnar hans blöstu við.
Mike Tyson's pre-fight interview got real cheeky. #PaulTyson pic.twitter.com/xPR3L0R9C0
— Netflix (@netflix) November 16, 2024
Bardaginn var og hefur verið umdeildur. Hann átti upprunalega að fara fram í sumar en var frestað vegna magasárs sem Tyson glímdi við. Tyson var margfaldur heimsmeistari í þungavigt á níunda áratugnum en hætti hnefaleikaiðkun endanlega fyrir tæpum tveimur áratugum.
Í þann mund sem andstæðingur hans Jake Paul var að fæðast, árið 1997, háði Tyson frægan bardaga við Evander Holyfield þar sem Tyson beit í eyra Holyfields.
A ringside look at #PaulTyson 👀 pic.twitter.com/WZlzvJ7gKX
— Netflix (@netflix) November 16, 2024
Það varð svo að hinn 27 ára gamli Paul, samfélagsmiðlastjarna sem sneri sér að hnefaleikum fyrir um sex árum síðan, hafði óumflýjanlega betur gegn gamla manninum. Ljóst þótti að Tyson þyrfti að ná rothöggi á Paul snemma til að fagna sigri og mátti sjá þreytumerki á Tyson eftir því sem leið.
Tyson var raunar hægur frá upphafi og eftir að hafa verið fagnað sem þjóðhetju þegar hann gekk í hringinn heyrðist baulað að honum undir lok bardagans.
Einhverjir aðdáendur í stúkunni höfðu yfirgefið svæðið þegar loks kom að því að dómarar dæmdu Paul 80-72, 79-73 og 79-73 sigur.
Paul heiðraði Tyson eftir bardagann og sagði mikinn heiður að fá að deila hringnum með þeim gamla. Um er að ræða ellefta sigur Pauls á atvinnumannaferli hans en hans eina tap var gegn Tommy Fury í fyrra.
Jake Paul praises Mike Tyson: "He's the GOAT" #PaulTyson pic.twitter.com/AhEBA5Ojoj
— Netflix (@netflix) November 16, 2024
Tyson vildi ekki gefast upp og ekki hægt að kalla það annað en óþægilegt augnablik þegar Tyson kallaði á yngri bróður Pauls, Logan, og sagðist vilja berjast aftur. Tapið er það sjöunda í 57 bardögum Tysons á ferli sem nær aftur til 1985.