„Mjög sátt, spennt og stolt að vera hluti af þessu“

Ingibjörg gekk í raðir Bröndby í byrjun september eftir erfiða tíma í Þýskalandi þar sem hún lék með Duisburg. Þar áður átti hún góðu gengi að fagna með Vålerenga í Noregi og lék einnig með Djurgården í Svíþjóð. Þau lið voru atvinnumannalið að fullu eins og Bröndby er orðið núna.

„Þetta þýðir að það eru fleiri stelpur í liðinu sem geta lagt áherslu á fótboltann, meiri tíma og vinnu í hann, sem hjálpar okkur að ná meiri árangri,“ sagði Ingibjörg í samtali við Vísi.

„Ég er frekar vön að vera í þannig atvinnumannaumhverfi. Það var allt öðruvísi að koma hingað, æfa seinni partinn þegar fólk var að koma beint úr vinnunni og gat kannski ekki gefið hundrað prósent á æfingum. Fyrir mig komandi úr svona umhverfi síðustu árin finn ég mikinn mun. Þetta er mjög spennandi og mjög gott, sérstaklega fyrir stelpurnar sem eru í vinnu. Þær geta loksins sett fulla einbeitingu á þetta.“

Að sögn Ingibjargar er um helmingur leikmanna Bröndby í vinnu. Flestar dönsku leikmannanna eru í vinnu eða í fullu námi.

Vön fullri atvinnumennsku

Ingibjörg hefur spilað í atvinnumennsku síðan 2018 og nær allan tímann verið í atvinnumannaumhverfi.

„Já, í Vålerenga var þetta kannski svipað ferli og þetta er að fara í núna. Þegar ég kom fyrst voru flestar sem voru atvinnumenn en einhverjar sem voru ekki alveg og þetta var í ferli. En mest allan tímann var þetta atvinnumennsku að fullu,“ sagði Ingibjörg.

Ingibjörg segir að hún hafi vitað að breytingar væru í farvatninu hjá Bröndby. Annars hefði hún ekki samið við liðið.

Aldrei farið nema þetta myndi breytast

„Ég er tekin inn sem hluti af þessu ferli, að breyta liðinu og taka næsta skref og koma inn með mína reynslu, bæði innan vallar og utan. Ég vissi alltaf að þetta væri að fara að koma og hefði aldrei tekið ákvörðun að fara þangað nema þetta færi að breytast. Ég er mjög sátt, spennt og stolt að vera hluti af þessu,“ sagði Ingibjörg.

„Þetta var rætt mikið og það voru einhver samtöl byrjuð í sumar þegar karla- og kvennaliðið sameinuðust. Þetta var alltaf markmiðið og er búið að vera ferli sem var loksins samþykkt núna.“

Grindvíkingurinn segir að það hafi verið viðbrigði að koma í hálfat­vinnu­manna­um­hverfi eftir að hafa verið vön hinu.

Litlu hlutirnir sem skipta ótrúlega miklu máli

„Já, alveg aðeins. Bara hlutir sem maður pældi ekkert mikið í. Maður finnur alltaf að orkan minnkar seinni partinn, maður er ekki á toppnum og nær kannski ekki að standa sig eins og maður vill á æfingu. Þetta eru bara svona litlir hlutir sem skipta ótrúlega miklu máli yfir lengri tíma og er ótrúlega mikilvægt,“ sagði Ingibjörg.

En hvernig er danska deildin miðað við aðrar deildir sem hún hefur spilað í?

„Þetta er mjög svipað norska og sænska boltanum. Það er mikil ákefð og barátta sem hentar mér mjög vel. Síðan er þetta deild og félög sem eru á uppleið, eins og Nordsjælland og nú er FCK líka komið með kvennalið þannig að þetta er mjög spennandi. Þetta er ólíkast Þýskalandi,“ sagði Ingibjörg sem nýtur sín vel hjá Bröndby eftir erfiða tíma hjá Duisburg.

„Algjörlega. Þetta var einmitt það sem ég þurfti. Líka að vera með þjálfara og þjálfarateymi sem vildi mikið fá mig og vill nýta þá styrkleika sem ég er með, bæði innan og utan vallar. Ég nýt mín mjög vel.“

Ingibjörg segir að Bröndby stefni hátt á næstu árum.

„Í nánustu framtíð ætlum við að vinna deildina hérna í Danmörku en síðan er markmiðið að vera með bestu liðum Skandinavíu og taka svipuð skref og Hammarby, Häcken og Vålerenga hafa gert; að reyna að komast í Meistaradeildina og keppa við bestu lið í heimi,“ sagði Ingibjörg að endingu.