Kim hafi stutt Rússa frá upp­hafi „heilags stríðs“ þeirra

Þetta er meðal þess sem haft er eftir Choi Son Hee, áðurnefndum ráðherra, sem fundaði með Sergei Lavrov, utanríkisráðherra Rússlands, í Moskvu í dag, á vef RIA fréttaveitunnar, sem er í eigu rússneska ríkisins.

Síðasta sumar skrifaði Vladimír Pútín, forseti Rússlands, undir varnarsamkomulag við Kim og var það samkomulag nýlega staðfest af rússneska þinginu.

Á fundinum sagði hún einnig að Norður-Kóreumenn væru sannfærðir um að Rússa myndu sigra og að þeir myndu standa þétt með „félögum“ sínum í baráttunni.

„Við efumst ekki um að undir viturlegri stjórn hins virta forseta Vladimírs Pútín, mun rússneski herinn og rússneska þjóðin vissulega ná miklum sigri í heilagri baráttu þeirra um að tryggja fullveldi þeirra og öryggi ríkis þeirra,“ hefur RIA einnig eftir Hee.

Ráðamenn í Úkraínu og á Vesturlöndum segja Kim hafa sent þúsundir hermanna til aðstoðar Rússa í átökunum við Úkraínumenn og að um átta þúsund þeirra séu nærri landamærum Úkraínu. Mögulegt sé að þeir taki þátt í átökum á næstu dögum.

Sjá einnig: Um átta þúsund norðurkóreskir her­menn á landa­mærunum

Áður hafa Rússar fengið mikið magn skotfæra, eldflauga og annarra hergagna frá einræðisríkinu.

Ráðamenn í Bandaríkjunum segja líklegt að norðurkóresku hermennirnir verði notaðir sem fótgöngulið og að þeir muni að öllum líkindum byrja að berjast við Úkraínumenn í Kúrsk á næstu vikum. Þeir eru sagðir klæðast rússneskum herbúningum og búnir rússneskum vopnum.

Vólódímír Selenskí, forseti Úkraínu, hefur gagnrýnt bakhjarla ríkisins vegna aðgerðaleysis þeirra vegna hermannaflutninganna frá Norður-Kóreu. Á blaðamannafundi í gær sagðist hann telja að Pútín og Kim hefðu komist að samkomulagi um frekari fólksflutninga.

Að Rússar vildu fá menn til reisa varnarvirki og sömuleiðis fólk til að vinna í hergagnaverksmiðjum í Rússlandi. Stjórn Seðlabanka Rússlands sagði nýverið, þegar stýrivextir voru hækkaðir í 21 prósent, að rússneskt hagkerfi skorti vinnuafl.

Sjá einnig: Stýrivextir ná sögulegu hámarki í Rússlandi

„Pútín er að kanna viðbrögð Vesturlanda,“ sagði Selenskí samkvæmt Reuters og sagðist hann telja að eftir þessi dræmu viðbrögð muni Pútín reyna að fá fleiri menn frá Norður-Kóreu.

Selenskí varaði fyrst við því að hermenn frá Norður-Kóreu væru væntanlegir þann 13. október. Síðan þá hafa ráðamenn á Vesturlöndum lýst hermannaflutningunum sem mikilli stigmögnun en ekki gripið til neinna aðgerða né tilkynnt að þeirra sé að vænta.

Saka Rússa um glæpi gegn mannkyninu

Mannréttindasérfræðingar á vegum Sameinuðu þjóðanna lýstu því yfir á blaðamannafundi í gær að pyntingar rússneskra hermanna á óbreyttum borgurum og stríðsföngum í Úkraínu væru „glæpir gegn mannkyninu“.

Teymið er leitt af Erik Møse og hefur það varið undanförnum árum í að rannsaka mannréttindabrot í Úkraínu. Hópurinn hefur á þeim tíma lýst kerfisbundnum brotum rússneskra hermanna sem gætu flokkast sem stríðsglæpir.

Fyrir rúmu ári síðan sagði Møse á fundi hjá Sameinuðu þjóðunum að rannsóknir teymisins hefðu varpað ljósi á að Rússar hefðu meðal annars pyntað Úkraínumenn til dauða og þvingað fjölskyldur til að hlusta á þegar hermenn nauðguðu konum í næsta herbergi.

Gögnum hefði einnig verið safnað um umfangsmiklar og kerfisbundnar pyntingar.

Møse sagði frá því á fundinum í gær að frekari upplýsingum hefði verið safnað af teyminu og að fundist hefðu vísbendingar um pyntingar í öllum hernumdum héruðum Úkraínu og í fangabúðum í sjálfu Rússlandi.

Rannsókn teymisins náði til 41 fangabúðar í níu héruðum Úkraínu og átta héruðum Rússlands.

Á fundinum sagði Møse að ofbeldi væri algengt í fangabúðum Rússlands, hvort sem það væri í Rússlandi eða á hernumdum svæðum í Úkraínu. Þá sagði hann teymið hafa fundið frekari vísbendingar um að kynferðislegt ofbeldi væri einnig notað til að pynta fólk.

Föngum væri nauðgað, þeir væru neyddir til að vera naktir löngum stundum og beittir ýmsu öðru kynferðislegu ofbeldi og það hafi valdið fólki andlegum skaða.

Teymið segir yfirmenn í rússneska hernum og embættismenn hafa vitað af og beinlínis hvatt til pyntinga á föngum.