Alveg óháð kynhneigð þinni eða kynvitund getur þér fundist gott að örva endaþarminn. Því miður er alltof algengt að við séum að miða okkur við eitthvað handrit sem segir okkur að við eigum eingöngu að hafa áhuga á ákveðinni kynhegðun. Algeng mýta um kynhegðun er að aðeins samkynhneigðir karlar stundi endaþarmsmök. Gagnkynhneigðir karlar, hinsegin konur, gagnkynhneigðar konur og fólk af öllum kynjum getur haft áhuga á því að veita eða þiggja örvun á endaþarmi.
Mikilvægt er að muna að kynhegðun, það sem þú gerir í kynlífi og kynhneigð, hverjum þú vilt gera það með, fara ekki alltaf saman. Alls konar fólk stundar alls konar kynlíf!
Kynlífið með Aldísi, sálfræðingi og kynlífsráðgjafa, er nýr vikulegur liður á Vísi. Í honum fræðir Aldís lesendur um kynlíf og svarar spurningum frá lesendum. Ef þú vilt senda Aldísi spurningu er hægt að finna spurningaform neðst í greininni.
Enn þann dag í dag tengjum við ákveðna kynhegðun við ákveðin kyn eða kynhneigðir. Þessi tenging gerir það að verkum að fólk finnur fyrir skömm eða fer að efast um kynhneigð sína fyrir það eitt að vilja prófa eitthvað nýtt í kynlífinu. Látum ekki gömul handrit taka frá okkur að njóta þess sem okkur finnst gott, kynlíf snýst um unað! Njóttu þess sem þér finnst gott og hendum þessu gamla handriti beint á haugana!
Endaþarmurinn er stútfullur af taugaendum sem geta aukið unað, og það hefur bara ekkert með kynhneigð að gera hversu gott okkur finnst að láta örva hann. Endaþarmsörvun getur verið margskonar. Hægt er að örva endaþarminn með tungunni, fingrunum, kynlífstækjum eða typpi og mörg upplifa mikinn unað við slíka örvun.
Minni hér á umfjöllun Indíönu Rósar, kynfræðings, um allt það helsta sem þarf að hafa í huga varðandi endaþarmsmök, því ýmislegt er gott að hafa í huga:
Það eru ekki margar rannsóknir til sem skoða sérstaklega hversu algengt það er að gagnkynhneigðir karlar stundi örvun á endaþarmi en margt bendir til þess að það sé algengara nú en áður. Ýmislegt getur skýrt þá þróun. Í nýlegri rannsókn kom fram að viðhorf karla til endaþarmsörvunar hefur breyst!
Margir tala opinskátt um áhuga eða reynslu af því að endaþarmurinn sé örvaður. Þeim fækkar sem upplifa það vera tabú eða tengja þessa kynhegðun við tiltekna kynhneigð. Þar að auki getur aukin umræða, forvitni eða löngun til að prófa eitthvað nýtt leitt til þess að gagnkynhneigðir karlar prófi sig áfram á þessu sviði.
Síðan er líka mikilvægt að muna að þó svo að umræðan um endaþarmsörvun hafi aukist þýðir það ekki að þú þurfir að fíla það eða prófa það. Það er í góðu lagi að vera ekki forviti/n/nn/ð eða vilja ekki prófa. Sum hafa prófað og tengja ekki unað við endaþarmsörvun á meðan önnur finna ekki fyrir áhuga á því að prófa það. Það að geta rætt langanir okkar, virt eigin mörk og annarra eru lykilþættir þegar kemur að því að prófa sig áfram í kynlífi!
