Segja má að undirbúningur íslenska landsliðsins fyrir EM í Sviss á næsta ári sé hafinn. Fyrri leikurinn við Bandaríkin verður fimmtudagskvöldið 24. október í Austin í Texas, og seinni leikurinn sunnudaginn 27. október í Nashville í Tennessee.
Þorsteinn hefur nú valið landsliðshóp sinn fyrir Bandaríkjaförina og sat fyrir svörum á blaðamannafundi í höfuðstöðvum KSÍ. Upptöku af fundinum má sjá að ofan.
Ein breyting er á landsliðshópnum frá síðustu leikjum, þegar Ísland kom sér inn á EM með sigri gegn Þýskalandi í sumar, en Sædís Rún Heiðarsdóttir snýr aftur í hópinn í stað Kristínar Dísar Árnadóttur.
