Golf Masters í Makaó í Asíu er mót fyrir fatlaða með þroskaskerðingu og er Sigurður fyrsti Íslendingurinn til þess að taka sæti á mótinu. Þangað var honum boðið vegna góðs árangurs.
„Ég fékk boð. Eftir að hafa keppt á Special Olympics í Berlín í Þýskalandi í fyrra. Um að taka þátt á Makaó Golf Masters mótinu í ár. Mér gekk rosalega vel út í Berlín. Náði öðru sæti á því móti líka og það komu fulltrúar frá Makaó Golf Masters á það mót og þar fylgdust þeir með kylfingum. Ég sýndi fram á einhverja hæfileika sem urðu til þess að ég fékk boð á mótið.“
Það fengu fimmtán bestu kylfingarnir í heiminum boð á þetta mót. Ég var einn af þeim. Sá eini frá Íslandi en alls voru sjö kylfingar þarna frá Evrópu. Ég er mjög þakklátur fyrir að hafa fengið boð til þess að keppa þarna úti og einnig rosalega stoltur af því. að fá að vera fyrsti Íslendingurinn til að keppa þarna. Fá að upplifa þetta mót. Næst ætlum við að taka fleiri Íslendinga með okkur.“
Lagði á sig mikla vinnu
Við tók spennandi ævintýri og um þrjátíu klukkustunda langt ferðalag frá Sandgerði til Makaó eftir að Sigurður hafði fjármagnað ferðina upp á eigin spýtur.
„Ég fór sjálfur í smá fjáröflun. Sótti um nokkra styrki og vann mér inn pening fyrir ferðinni með því að þrífa bíla. Ég hef reynslu af því. Ég bónaði bíla í einhverja tvo mánuði og var fullbókaður í því.
Og öll vinnan sem hann lagði á sig borgaði sig því Sigurður gerði sér lítið fyrir og vann til silfurverðlauna á mótinu eftir að hafa ekki ætlað sér að sækja mót út fyrir landsteinana í ár.
„Ég var ekkert að hugsa um að kíkja út á eitthvað golfmót. Markmið mín sneru að því að lækka forgjöfina í sumar. En ég er mjög sáttur með það hvernig til tókst. Ég náði að halda fókus og varna því að ég myndi missa hausinn. Því ef maður missir hausinn þá fer allt í rugl. Ég upplifði það smá í Berlín þar sem að ég átti tvær slæmar holur. Þá hugsaði ég með sjálfum „okey þessar tvær holur eru frá. Nú núllstilli ég mig og ætla að fókusera á næstu holur. Þá fór allt í réttan farveg hjá mér.“
Vill meira
Úti í Makaó var Sigurður að spila í allt öðruvísi aðstæðum en hann er vanur hér heima.
„Við fengum rosalega mikið af sól og hita úti. Við byrjuðum klukkan níu á morgnanna að spila og spiluðum níu holur í um þrjátíu stiga hita og miklum raka. Hitinn varð síðan bara meiri eftir því sem leið á daginn.“
Svo sannarlega mikil lífsreynsla fyrir Sigurð sem er félagi í Golfklúbbi Sandgerðis. Auk þess að sinna golfinu starfar hann á leikskóla og gat glatt börnin með silfurmedalíunni þegar að hann sneri aftur heim til Íslands.
„Þær voru rosa stoltar af mér stúlkurnar í vinnunni og krakkarnir. Ég hafði verið í fríi í rúma viku. Það var tekið vel á móti mér er ég sneri aftur. Með medalíuna og allt.“
Eitt er víst og það er að Sigurður hefur mjög mikla ástríðu fyrir golfíþróttinni.
„Ég hef verið í golfi síðan árið 2002 þökk sé afa mínum honum Friðjóni. Hann tók mig og bróðir minn alltaf með sér á golfæfingar á sumrin. Síðan þá hef ég haldið mig við golfið. Þetta er íþrótt sem snýr að bæði andlegu og líkamlegu hliðinni. Það er góð hreyfing í þessu. Mikið labb. Hugarleikfimi líka sem krefst því að maður haldi einbeitingu og missi ekki hausinn. Ég vil ná aðeins lengra í íþróttinni. Markmiðið er að komast í meistaraflokkinn á meistaramótinu og komast á fleiri golfmót erlendis.“
