Pælingar eldri kylfings á Spáni ekki efstar á vandræðalista flokksins

Bolli í Sautján sendi miðstjórn Sjálfstæðisflokksins bréf fyrir tveimur mánuðum þar sem hann óskaði eftir leyfi til að bjóða fram viðbótarlista tengdan Sjálfstæðisflokknum í þingkosningum á næsta ári, svokallaðan DD-lista. Hann hefur enn ekki fengið svar en þeir þingmenn sem DD-listinn fengi myndu ganga til liðs við þingflokk Sjálfstæðismanna að loknum kosningum.

Hann segir mikinn áhuga á hugmynd hans en þar eigi að smala saman þá sem hafi kosið flokkinn áratugum saman. Einungis þeir sem hefðu áorkað einhverju fengju sæti á listanum og myndu gamlir framámenn flokksins sjá um uppstillingu.

„Við erum ekkert að leita að einhverjum, hvað á ég að kalla það. Einhverjum nýútskrifuðum stúlkum sem ætla bara að blása á sér hárið og naglalakka sig. Þó ég hafi fulla virðingu fyrir ungu fólki þá þurfum við fólk með reynslu og eitthvað fólk sem hefur áunnið sér eitthvað í lífinu,“ segir Bolli.

Friðjón staldrar við ummæli Bolla um nýútskrifuðu stúlkurnar.

„Hér er birtingarmynd ákveðins vanda sem við í Sjálfstæðisflokknum þurfum að eiga við. Það er aðeins of mikið til af eldri mönnum sem hafa ekki áttað sig á því að konur á fertugsaldri með góða menntun, mikla reynslu úr stjórnmálum og stjórnsýslu geti nokkurn skapaðan hlut,“ segir Friðjón.

Meðal kvenna sem passa í það box má nefna ráðherrana Áslaugu Örnu Sigurbjörnsdóttur og Þórdísi Kolbrúnu Gylfadóttur.

„Þeir sakna mest þess tíma þegar þeir voru ungir menn og fannst sjálfsagt að hæfileikalausir vinum þeirra væri lyft langt umfram efni og gáfur.“

Hann segir Bolla í seinni tíð helst hafa stundað hatramman áróður gegn EES samstarfinu af golfvelli á Suður-Spáni.

„Hvar hann ílengist í skjóli EES-samstarfsins. Það er margt sem flokkurinn þarf að huga að, í stöðunni sem hann er. En að sinna hugðarefnum hálf-áttræðs kylfings á Suður-Spáni er ekki efst á þeim lista.“

Sýður upp úr

Fleiri eru hugsi yfir orðum Bolla. Fólk utan flokksins sem tekur ríkan þátt í samfélagsumræðu á Facebook. Þeirra á meðal er Egill Helgason fjölmiðlamaður.

„Nú virðist allt vera að sjóða upp úr í Sjálfstæðisflokknum, en þessi ummæli eru varla til framdráttar uppreisnarmönnum í flokknum. Kannski þó einhverjir sem fíla þau?“ spyr Egill.

„Við erum að fara inn í mjög skrítinn pólitískan vetur þar sem kjósendur virðast ætla að veita núverandi ríkisstjórn og flokkunum sem hana skipa ráðningu.“

Hödd Vilhjálmsdóttir almannatengill stingur líka niður penna.

„Æ það er nú svolítið áhugavert að krúttleg karlremba á áttræðisaldri hafi áhyggjur af blæstri og naglalökkun ungra kvenna í pólitík. Ég get eiginlega ekki annað en velt því fyrir mér hvernig blessaður Bollinn hefur orku í þetta DD flipp sitt þar sem dágóður tími hlýtur nú að fara hjá honum í að halda hárinu á sér svona svörtu,“ segir Hödd.