Andri Lucas: „Fyrir ári síðan var maður bara á bekknum í Sví­þjóð“

Andri var áður á mála hjá sænska félaginu Norrköping en stökk til þegar Freyr Alexandersson, þáverandi þjálfari Lyngby, vildi fá hann til að leysa af Alfreð Finnbogason, sem var nýfarinn frá félaginu.

„Það er kannski ekkert eitthvað eitt sem getur útskýrt allt saman sem gerðist í Svíþjóð, það kom inn þjálfari sem vildi bara spila með einn framherja og hinn framherjinn sem ég var að berjast um sæti við var fyrirliði og ég meina, það er bara regla númer eitt í fótboltanum að aldrei berjast um sæti við fyrirliða,“ sagði Andri og brosti út í annað.

„Við tókum nokkur símtöl ég og Freysi. Alfreð var einmitt að fara þannig þeim vantaði framherja, maður stökk á þetta og bara búið að vera geggjað ár,“ bætti hann svo við.

Gott að koma heim og sofa aðeins út

Andri hvílir sig nú eftir langt og strangt tímabil en hann var markahæsti leikmaður Lyngby sem tókst með herkjum að halda sæti sínu í úrvalsdeildinni.

„Þetta var krefjandi og erfitt tímabil með Lyngby, fínt að koma heim og slaka aðeins á. Maður fær að sofa út, svo nýtir maður tímann til að hitta fjölskyldu og vini sem maður fær ekki að hitta eins oft.“

Andri kom upphaflega til Lyngby á láni, en stjórnarmenn voru svo sáttir með hann að þeir vildu strax festa kaup. Það var þó ekki fyrr en í apríl að félögin Lyngby og Norrköping gengu frá kaupsamningi og Andri skrifaði undir þriggja ára samning.

„Lyngby vildu klára það af strax að kaupa mig, bara eftir mánuð. Ég held að þeir hafi séð strax hvað ég passaði vel inn í liðið og já á endanum kaupa þeir mig frá Norrköping sem ég var ótrúlega ánægður með.“

Keyptur og strax seldur

Aðeins um mánuði síðar var Andri seldur burt frá Lyngby til belgíska félagsins Gent. Fyrrum landsliðsþjálfari Íslands, Arnar Þór Viðarsson, gegnir yfirmannsstöðu hjá félaginu og hafði mikið að segja í málinu.

„Það var kannski pínu öðruvísi að hann [Arnar Þór] hafi svo komið til mín að reyna að fá mig yfir til Gent.“

Gent borgaði 3 milljónir evra fyrir Andra sem gerir hann að dýrasta leikmanni sem Lyngby hefur nokkurn tímann selt frá sér.

„Það er alveg góð tilfinning en líka skrítið á sama tíma, fyrir ári síðan var maður bara á bekknum í Svíþjóð og einhvern veginn ekkert að ganga upp. Allt í einu ári seinna er allt þetta að gerast þannig maður vill ekki vera of hátt uppi heldur halda áfram með sama hugarfar og ég hef verið með síðasta árið. Hausinn niður, halda áfram að vinna og bæta sig sem fótboltamaður.“

Innslagið allt úr Sportpakkanum má sjá í spilaranum fyrir ofan. Seinni hluti viðtalsins verður svo birtur síðar í vikunni.