„Frammi­staðan til fyrir­myndar í dag“

„Þetta leit kannski út fyrir að vera þægilegt. En mér fannst samt alltaf eins og þeir gætu náð inn marki. Þá hefði þetta orðið leikur. Mér fannst við gera mjög margt vel í dag og heilt yfir frábærir. Það eru einhver augnablik sem við getum gert betur en heilt yfir frábær leikur.“ sagði Jökull og bætti við um frammistöðu liðsins.

„Frammistaðan var til fyrirmyndar í dag, hjá öllum. Það komu allir inn með kraft og ætluðu að ýta okkur hærra og lengra og gera meira. Frábærir í dag.“

Margir leikmenn áttu góða frammistöðu í dag og þá sérstaklega uppaldir Stjörnumenn í þeim Róberti Frosta, Helga Fróða og Örvari Loga sem dæmi. Jökull tók undir það að það væri sérlega ánægjulegt og bætti við:

„Frábært að fá frammistöðu frá þessum mönnum. Svo kemur Haukur Brink inná með krafti. Hann er að byrja að fá mínútur. Einnig Alexander Máni sem kemur inn í fyrsta sinn. Líka bara hinir, varnarlínan okkar er frábær og Árni í markinu. Stjórnunin varnarlega var alveg brilljant. Það er svo margt og ég er gríðarlega ánægður með alla í dag.“

Byrjun Stjörnunnar á tímabilinu hefur ekki verið sannfærandi en liðið er komið aftur á sigurbraut eftir erfitt tap í síðustu umferð. Getur Stjarnan spyrnt sér af stað eftir þennan sigur?

„Ég veit það ekki. Það er búið að tala svo oft um þessa tvo fyrstu leiki. Í dag er bara tækifæri til að fagna þessum leik, hann var frábær. Á morgun er síðan tækifæri til að undirbúa okkur vel fyrir næsta leik. Það er ekkert hægt að gera þetta öðruvísi. Það er stutt í næsta leik á móti Val þannig það er bara full einbeiting.“