Dregið úr hrinunni við Sýlingarfell

Nokkrir skjálftar yfir tveimur stigum að stærð þar sem sá stærsti var 3,5 stig riðu yfir suður af Eldeyjarboða á Reykjaneshrygg í nótt. Einar Hjörleifsson Náttúruvársérfræðingur hjá Veðurstofunni segir að þar hafi þó aðeins verið um flekahreyfingar að ræða.

Við Sýlingarfell virðist jarðskjálftahrinan sem gekk þar yfir í gær gengin yfir og óljóst hvort um kvikuinnskot hafi verið að ræða:

„Við sjáum töluverða skjálftavirkni í gærkvöld þar sem mældust sjö smáskjálftar við kvikuganginn á stuttum tíma,“ segir Einar Hjörleifsson náttúruvársérfræðingur hjá Veðurstofunni. Hann segir að í framhaldinu hafi viðbúnaður verið aukinn í nótt en að svo virðist sem nú sé virknin gengin niður og orðin hefðbundin á ný.

Einar segir ekki hægt að slá því föstu að um kvikuhlaup hafi verið að ræða í gær. „Þá var það mjög, mjög lítið en þarf ekki að hafa verið kvika heldur aðeins skjálftavirkni á svæðinu.“