At­burðirnir fyrir botni Mið­jarðar­hafs því sem næst „óraunverulegir“

Það er í gegnum Rafah-landamærastöðina sem hjálpargögn hafa helst borist almennum borgurum en landamærastöðin hefur líka verið eina útgönguleiðin fyrir íbúa Gasa. Í borginni er fjöldinn allur á vergangi og talið er að um rúm milljón Palestínumanna hafist þar við í tjöldum eða yfirfullum íbúðum. Í nótt létust tuttugu og þrír óbreyttir borgarar í loftárásum Ísraels, þar af sex börn.

Allherjarinnrás í Rafah „martraðakennd mannúðarkrísa“

Ýmsir þjóðarleiðtogar og forsvarsmenn mannúðarsamtaka vara Ísraelsmenn við frekari árásum á Rafah. Þeirra á meðal er Antonio Guterres, aðalframkvæmdastjóri Sameinuðu þjóðanna.

„Jafnvel bestu vinir Ísraels tala skýru máli: Árás á Rafah væri hernaðarlegt glappaskot, pólitískt hörmungarástand og martraðakennd mannúðarkrísa,“ sagði Guterres í ávarpi í dag.

Magnea Marinósdóttir, alþjóðastjórnmálafræðingur, segir árásirnar tengjast samningaviðræðum Ísrael og Hamas. Hún er ekki bjartsýn á að samkomulag náist.

„Ísrael vill eingöngu veita 40 daga vopnahlé og fá leysta úr haldi gísla til þess að koma til móts við kröfur almennings í Ísrael en á sama tíma vilja þeir ekki láta af því markmiði að gera hernaðarárás á Rafah vegna þess að það er síðasta vígið við að uppræta Hamas, og það er markmið þessarar ríkisstjórnar. Hamas liðar vilja að átökunum linni og Ísrael dragi herafla sinn til baka.“

Atburðirnir fyrir botni Miðjarðarhafs séu því sem næst óraunverulegir.

„Þetta er rosalega furðuleg staða. Þetta er eins og að verða vitni að einhverju raunveruleikasjónvarpi sem er allt svo óraunverulegt. Þarna eru 35 þúsund manns látnir, tæplega 80 þúsund manns særðir og 1139 sem létust í árásum Hamas og það eru réttarhöld í gangi um meint þjóðarmorð.“

Ekkert fái stöðvað árásir nema þrýstingur utan frá

Spurningin nú sé hvort alþjóðasamfélagið finni leiðir til að halda aftur af ríkisstjórn Netanjahú.

„Hann er búinn að lýsa því yfir hvað hann ætli að gera og hann er að gera það. Þá er spurning hvað gerist í kjölfarið. Koma til slit á stjórnmálasamskiptum? Koma til viðskiptaþvinganir? Hvað gera þá ríkin í ljósi þess að árásir á Rafah eru hafnar og munu líklega halda áfram nema það komi einhver gífurlegur þrýstingur utan frá.“

Magnea segir að erfitt sé vita hvort menn mæti til viðræðna af heilum hug því hana gruni að Netanjahú vilji draga stríðið fram yfir forsetakosningarnar í Bandaríkjunum.

„Ef Trump myndi komast aftur til valda þá væri Netanjahú hugsanlega kominn með bandamenn sem gerði það að verkum að hann myndi ná fram þeim markmiðum sem hann vill ná fram, sem yrðu ekki góðar fregnir fyrir Palestínumenn sem vilja sjá frjálsa Palestínu,“ segir Magnea.