Vonast til að koma dánar­búinu í góðar hendur

„Við verðum amk næstu tvö árin með öfug orkuskipti sem þýðir að við erum með neikvæða þróun í grænu orkunni sem við státum okkur af. Það er skortur á raforku og því þurfa fyrirtæki í stóriðju að fara í olíu aftur, losun eykst og loftslagsbókhaldið okkar hefur farið niður,“ segir Guðlaugur Þór.

Guðlaugur Þór var gestur í viðtali í hlaðvarpinu Ekkert rusl sem Lena Magnúsdóttir og Margrét Stefánsdóttir halda úti. Hann segir að við verðum vinna hratt og láta hendur standa fram úr ermum til þess að mæta orkuþörfinni. Lítið hafi verið hugsað til framtíðar síðustu fimmtán til tuttugu árin. Þessi staða sé afleiðing þess. 

Hann segist þó ekki hafa áhuga á að vera með barlóm og tala um allt sem er miður heldur hugsa í lausnum og hætta að væla. 

Verndarhringur um heimilin

Guðlaugur talar um forfeður okkar sem voru í raun frumkvöðlar í orkumálum og bjuggu til sínar eigin raforkustöðvar úti á landsbyggðinni. Hann vill sjá meira af slíku framtaki hjá okkar kynslóð og talar um birtuorku, ekki sólarorku því Íslendingar tengi lítið við sól en sterkt við birtu. 

Birtuorkuna mætti nýta miklu betur og um leið og fólk fer að sjá fjárhagslegan ávinning af því að setja upp birtusellur hjá sér, þá er það tilbúið í grunnfjárfestinguna. Guðlaugur Þór segir að raforka muni bara koma til með að hækka í verði en fullyrðir að búið sé að setja ákveðinn verndarhring utan um heimilin því þau eigi áfram að njóta góðs af lágu raforkuverði.

„Við getum algjörlega náð markmiðum okkar um 100% græna orku árið 2040 sem þýðir að við verðum sjálfbær og laus við jarðeldsneyti en við verðum að vinna hratt og þess vegna er ég að losa um hömlur sem varða virkjanir,“ segir Guðlaugur Þór.

Ekki fastagestur í Góða hirðinum

Ruslamálaráðherra, eins og hann kallar sig stundum, segist ekki versla notuð föt og ekki vera reglulegur gestur í Góða hirðinum. Hann er um þessar mundir að að fara í gegnum dánarbú foreldra sinna og vilji að aðrir njóti góðs af því sem þar er að finna.

Hann segist hafa byrjað ferilinn sinn sem ruslamálaráðherra þegar hann var ungur alltaf látinn fara út með ruslið. Í Góða hirðinn koma þrír gámar af nothæfu dóti daglega og Guðlaugur Þór hefur jákvætt viðhorf til þess. 

„Það er aftur komin smá vakning eins og foreldrar okkar og ömmur okkar og afar tileinkuðu sér, því þá hafði fólk minna á milli handanna. Við erum farin að nýta hlutina örlítið betur og erum meðvitaðri um að láta þá fara áfram og inn í hringrásarhagkerfið,“ segir Guðlaugur Þór. 

Vill reglulegri losun á tunnum

Hann nefnir verkefnið 200.000 tonn af tækifærum undir forystu Þórs Sigfússonar, stofnanda Sjávarklasans, en út úr því kom meðal annars að hægt væri að endurnýta steypu. Það hafi gerst með einu símtali. Stundum þurfi lítið til.

Guðlaugur Þór og Ágústa Johnson eiginkona hans taka heilshugar þátt í Plokkdeginum sem er á sunnudag. 

„Það er svo miklu skemmtilegra að týna rusl í góðum félagsskap sama hvernig viðrar,“ segir Guðlaugur Þór og kvartar örlítið yfir því að Reykjavíkurborg tæmi ruslatunnurnar ekki nógu oft, sem verður til þess að plast og annað rusl fýkur út í hvippinn og hvappinn.