Fjöl­brauta­skóli Suður­lands mætir Tækni­skólanum í úr­slitum

FG og FSu voru í 2. og 3. sæti hvort fyrir sig í undankeppni leikanna. Keppt var í Valorant, Counter-Strike 2 og síðan Rocket League að lokum.

Viðureignin hófst með sigri FSu í Valorant á kortinu ,,Ascent” en fór leikurinn 13-7 fyrir Framhaldsskóla Suðurlands þar sem FG valdi varnarhelming.

Mikið var í húfi fyrir FG þar sem að skólinn þurfti að vinna Counter-Strike til þess að halda sér í viðureigninni en Fjölbrautaskólanum í Garðabæ tókst að klóra sig í gegnum Counter-Strike leikinn 13-11 eftir harða baráttu. Valdi FG einnig varnarhelming í þeim leik. Valt því sigur viðureignarinnar á niðurstöðu Rocket League leikjanna.

Fyrsta leikinn unnu FSu með naumindum 3-2 en FG harðneituðu að láta senda sig heim og svöruðu mótherjum sínum með tæpum 2-1 sigri í öðrum leiknum. Þó dugði það ekki til þar sem að FSu unnu þriðja leikinn 3-1 og með sigrinum tryggði skólinn sig í úrslit gegn Tækniskólanum með 2-1 sigri í viðureigninni.

Úrslitin munu eiga sér stað næstkomandi miðvikudag, 17. apríl kl. 19:30 en hægt verður að fylgjast með þeim í beinni útsendingu á streymisrás Rafíþróttasambands Íslands og á Stöð 2 Esports. Þar að auki verður hægt að mæta á Arena, þjóðarleikvang rafíþrótta á Íslandi, til þess að horfa á leikina í eigin persónu þar sem að úrslitaliðin munu spila leiki sína. Arena er staðsett á Smáratorgi 3 í Kópavogi.