Árangurinn af 35 ára sam­starfi í Malaví á­þreifan­legur

Sunna Sæmundsdóttir fréttamaður stödd í Malaví og segir magnað að sjá hversu margir þekki Ísland og samstarfið. Landið sé fallegt en það sé margt átakanlegt. Sunna, ásamt Einari Árnasyni tökumanni Stöðvar 2, ferðast nú um Malaví til að skoða þau verkefni sem íslenska ríkið hefur styrkt síðustu 35 árin. 

Þau hafa sem dæmi heimsótt fæðingarheimili í Mangochi-héraði þar sem þau hittu unga konu sem fæddi barn fyrr um daginn. Hún hafði komið á fæðingarheimilið fótgangandi og setti saga hennar hlutina fyrir þau í samhengi. Sunna ræddi við Ingu Dóru Pétursdóttur, forstöðukonu sendiráðs Íslands í Malaví, í kvöldfréttunum í gær.

„Við erum búin að vera í samstarfi í 35 ár og alltaf í Mangochi-héraði,“ segir Inga Dóra en héraðið er það fjölmennasta utan höfuðborgarinnar. Þar búa alls 1,3 milljónir.

Áhersla á menntun og styrkingu kvenna og stúlkna

Inga Dóra segir að í þau 35 ár sem íslenska ríkið hafi styrkt þróunarsamvinnu í Malaví hafi alltaf verið lögð áhersla á það sama. Menntun, aðgengi að hreinu vatni, heilsu með áherslu á verðandi mæður og ungabörn og svo jafnrétti með áherslu á ungar konur og stúlkur.

Inga Dóra segir að frá árinu 2012 hafi þau unnið í gegnum héraðsstjórnir sem séu eins og sveitarstjórnaryfirvöld í héraðinu. Þau beri ábyrgð á því að veita þjónustuna og hafi gert það frá þeim tíma með fjárhagslegum stuðningi frá íslenska ríkinu.

„Við erum ofboðslega stolt af þessu samstarfi og þessum áþreifanlega árangri sem við erum að sjá af þessu verkefni.“

Spurð um áhrifin af þessu verkefni segir inga Dóra að það tengist allt sem þau geri. Með því að mennta börn búi þau til nýja leiðtoga, sem sé þörf á í Malaví.

„Þegar við erum að bjarga lífi mæðra erum við ekki bara að bjarga einu mannslífi heldur móðir margra barna og þegar mörg börn missa móður sína þá riðlast allt á heimilinu. Þá erum við komin með hálfmunaðarlaus börn.“

Inga Dóra segir einnig að með því að auka aðgengi að hreinu vatni hafi verið komið í veg fyrir ungbarnadauða. Í héraðinu fæðist alls 70 þúsund ný börn á hverju ári og að með því að koma hreinu vatni til fólksins í héraðinu hafi þeim tekist að fækka ungbarnadauða um 56 prósent og mæðradauða um 34 prósent frá árinu 2017.

„Við sjáum bara að þetta breytir lífi fólks og við finnum fyrir afskaplega miklu þakklæti. Ekki bara frá héraðsyfirvöldum og ríkisstjórninni heldur líka frá fólkinu sjálfu.“

Á þessu korti er hægt að sjá öll verkefnin sem íslenska ríkið hefur styrkt síðustu árin.