Hákon átti þátt í fjórum af tólf mörkum Lille

Golden Lion FC er frá franska handanhafshéraðinu Martinique. Félagið hefur orðið úrvalsdeildarmeistari þar fimm af síðustu níu tímabilum, þar af síðustu þrjú tímabil í röð. En þrátt fyrir yfirburði heima fyrir áttu þeir ekki roð í Lille. 

Staðan var 7-0 fyrir Lille í hálfleik. Hákon Arnar var eini sóknarmaður liðsins sem komst ekki á blað í fyrri hálfleik en breytti því fljótlega í seinni hálfleik. 

Hákon lagði áttunda markið upp á Tiago Santos, fór svo á vítapunktinn og skoraði níunda markið sjálfur. Aftur lagði hann upp þegar Jonathan David skoraði tíunda markið og Hákon setti svo sjálfur ellefta mark Lille á 78. mínútu. 

Fljótlega eftir það fór Hákon af velli fyrir Amine Messoussa sem skoraði tólfta og síðasta mark leiksins. Með þessum sigri heldur Lille áfram í 32-liða úrslit franska bikarsins.