Fótbolti

Davíð hafði ó­vænt betur í bikarslag ungu ís­lensku fram­herjanna

Óskar Ófeigur Jónsson skrifar
Davíð Snær Jóhannsson og félagar í liði Álasund eru að upplifa mikið bikarævintýri.
Davíð Snær Jóhannsson og félagar í liði Álasund eru að upplifa mikið bikarævintýri. Aalesund

Davíð Snær Jóhannsson og félagar í Álasund tryggðu sér í kvöld sæti í undanúrslitum norsku bikarkeppninnar.

Viking, sem spilar í úrvalsdeildinni, varð að sætta sig við að detta út á móti nýliðum Álasund. Þetta eru mjög óvænt úrslit en sýna að strákarnir í Álasund eru til alls líklegir í sumar.

Viking komst í 1-0 en Álasund skoraði tvö mörk í seinni hálfleik og tryggði sér sigur og sæti í undanúrslitum.

Þetta var Íslendingaslagur því framherjarnir ungu Hilmir Rafn Mikaelsson og Davíð Snær Jóhannsson voru báðir í byrjunarliðum sinna liða, Hilmir Rafn í þriggja manna framlínu Viking og Davíð í tveggja manna framlínu Álasund.

Hilmir Rafn lagði upp mark Ola Visted á 15. mínútu. Hann var tekinn af velli eftir að Álasund jafnaði metin.

Marius Andresen skoraði jöfnunarmarkið á 65. mínútu og sigurmarkið skoraði Mathias Christensen á 75. mínútu.

Davíð var tekinn af velli á 88. mínútu.

Þetta var fyrsti leikur átta liða úrslitanna sem klárast svo á næstu dögum.




Fleiri fréttir

Sjá meira


×