Mourinho truflaði fyrr­verandi að­stoðar­mann sinn á blaða­manna­fundi

Ricardo Formosinho vann lengi með Mourinho en er núna þjálfari Modern Future í Egyptalandi. 

Liðið mætti Pyramids í undanúrslitum egypska ofurbikarsins á jóladag og leikurinn var dramatískur í meira lagi. Markalaust var eftir venjulegan leiktíma og því réðust úrslitin í vítaspyrnukeppni. Hvorki fleiri né færri en 34 spyrnur þurfti til að knýja fram úrslit og að lokum var það Modern Future sem hafði sigur, 14-13.

Eftir leikinn ræddi Formosinho við blaðamenn en á miðjum fundi fékk hann símtal frá engum öðrum en Mourinho.

Formosinho baðst afsökunar á trufluninni en sagðist þurfa að svara enda væri Mourinho hinum megin á línunni. Þeir töluðu saman í um fimmtán sekúndur áður en fundurinn hélt áfram.

Formisinho og Mourinho störfuðu meðal annars saman hjá Porto, Real Madrid, Manchester United og Tottenham.