„Við sáum þetta bara springa fyrir augum okkar“

„Ég segi allt gott. Það er bjart, kannski ekki bjart yfir, en það er bjart akkúrat núna,“ segir Börkur í samtali við Vísi. Hann var að koma frá Keflavíkurflugvelli þegar hann sá jörðina springa, eins og hann orðar það.

„Já, ég var á ferð ásamt þeim yngri, eða við vorum að sækja þann eldri sem var að koma frá Boston. Ég sé útundan mér blossa og segi við strákana, þetta er örugglega veghefill að skafa. En, þá sáum við þetta bara springa fyrir augum okkar. „Once in a livetime experience“,“ segir Börkur.

Klukkan var nákvæmlega 22.23 þegar þetta gerist. Og þeir að keyra frá flugstöðvarbyggingunni. Börkur segir þetta virka löng sprunga sem hafi opnast og eldtungurnar teygi sig hátt til lofts.

„Þetta virðist vera stærra en fyrri gos,“ segir Börkur.