Krefjast tafar­lausra við­bragða við voða­verkum á Gasa

Bréfið er stílað á Katrínu Jakobsdóttur, forsætisráðherra; Bjarna Benediktsson, utanríkisráðherra; Guðrúnu Hafsteinsdóttur, dómsmálaráðherra; Lilju Dögg Alfreðsdóttur, menningar- og viðskiptaráðherra og Guðna Th Jóhannesson, forseta Íslands.

Fjölmargir þekktir Íslendingar hafa skrifað undir bréfið, listafólk og aktívistar eru þar fyrirferðarmikil. Þar má nefna Drífu Snædal, Sóleyju Tómasdóttur, Sögu Garðarsdóttur, Semu Erlu og Eddu Falak. Einnig hafa rithöfundarnir Hallgrímur Helgason, María Elísabet Bragadóttir, Bragi Páll Sigurðsson, Bergþóra Snæbjörnsdóttir og Kristín Eiríksdóttir skrifað undir bréfið.

Ísland þegi þunnu hljóði á meðan „ólýsanleg voðaverk“ eru framin

Í bréfinu segir að tveir mánuðir séu liðnir frá því að „ógnarstjórn Ísraelsríkis með stuðningi vesturveldanna hóf að strádrepa Palestínufólk á Gaza í nafni sjálfsvarnar“. 

Skýrar skilgreiningar séu til í alþjóðasamningum á því hvað felst í slíkri sjálfsvörn en Ísraelsríki hafi farið langt út fyrir lagalegan ramma og fremji nú þjóðarmorð og stríðsglæpi á Gasa, Vesturbakkanum og í Austur-Jerúsalem.

Þá segir að þrátt fyrir ítrekuð brot Ísraels á „Mannréttindayfirlýsingu Sameinuðu þjóðanna, sáttmála Sameinuðu þjóðanna um réttindi barnsins, sáttmála Sameinuðu þjóðanna um ráðstafanir gegn þjóðarmorði og fleiri alþjóðasáttmálum og lagabálkum, hafa íslensk stjórnvöld ekki enn staðið við þær skuldbindingar sem þau hafa undirgengist í framangreindum löggerningum.“

Ísland hafi viðurkennt sjálfstæði Palestínu í desember 2011 en þegi nú þunnu hljóði „á meðan ólýsanleg voðaverk eru framin,“ segir í bréfinu. Stjórnvöld hafi hvorki nýtt rödd sína né uppfyllt fyrrgreindar skyldur sínar gagnvart palestínsku þjóðinni og heimsbyggðinni allri. 

Alþjóðleg vernd, slit á stjórnmálasambandi og brottvikning úr Eurovision

Hópurinn krefst þess að Ísland beiti sér á alþjóðavettvangi og setur fram eftirfarandi kröfur:

„Við krefjumst þess að íslensk stjórnvöld taki umsóknir palestínskra umsækjenda um alþjóðlega vernd hér á landi til efnislegrar meðferðar án tafar og veiti þeim hér alþjóðlega vernd í kjölfarið á grundvelli 37. gr. laga um útlendinga nr. 80/2016.

Við krefjumst þess að Ísland slíti bæði stjórnmála- og viðskiptasambandi við Ísraelsríki undir eins. Í því samhengi má nefna að Ísland tekur fullan þátt í víðtækum þvingunaraðgerðum gegn Rússlandi, á grundvelli laga um framkvæmd alþjóðlegra þvingunaraðgerða.

Að auki krefjumst við þess að Ísland segi sig frá þátttöku í Söngvakeppni evrópskra sjónvarpsstöðva, verði Ísraelsríki ekki vísað úr keppni.“ Söngvakeppnin eigi að vera sameiningartákn Evrópu fyrir friði og skýtur því skökku við að ríki sem fremur þjóðarmorð og stríðsglæpi fái að taka þátt. Þá er rifjað upp að þegar Rússum var vikið úr keppni var helsta ástæðan sú að fjölmargar þjóðir neituðu að taka þátt með Rússum.