Guð­laugur Þór segir öllum of­bjóða hryllingurinn á Gaza

Gríðarlegt mannfall og eyðilegging blasir í Gazaborg og nágrenni. Frá því Ísraelsher hóf árásir sínar eftir hryðjuverk sveitar Hamas fyrir mánuði, hafa heimili og sjúkrahús ásamt öðrum innviðum orðið fyrir stöðugum loftárásum.

Ísraelsher hefur haldið loftárásum áfram á Gaza í dag þar sem yfir tíu þúsund manns hafa fallið, þar af yfir fjögur þúsund börn frá því átökin hófust. Fjöldi barna og fullorðinna hefur að auki særst og alger ringulreið ræður ríkjum þar sem foreldrar og aðrir ættingjar leita að ástvinum sínum í húsarústum og á þeim sjúkrahúsum sem enn eru starfhæf.

Á myndum í meðfylgjandi sjónvarpsfrétt sjást tugir manna fylgja tveimur börnum til grafar í Gazaborg í dag.

Hátt á þriðja hundrað mótmælenda kom saman fyrir utan Ráðherrabústaðinn fyrir ríkisstjórnarfund í morgun þar sem þess var krafist að íslensk stjórnvöld kölluðu þegar eftir vopnahléi í átökunum.

 Margrét Kristín Blöndal, Magga Stína,  tónlistarkona var á meðal mótmælenda. Hún segir fólki eðlilega verða brjálað þegar verið væri að fremja þjóðarmorð á innikróaðri þjóð.

Almenningur styður ekki fjöldamorð á börnum

„Almenningur vill ekki fjöldamorð, vill ekki fjöldamorð á börnum. Hann vill ekki þessa viðbjóðslegu valdníðslu og þann níðingsskap sem verið er að sýna,“ sagði Magga Stína meðal annars í viðtali við fréttastofu.

Ísraelsmenn eru komnir með landher inn á Gazaströndina og segjast hafa náð að umkringja borgina og skipta henni í tvennt. Markmið þeirra er að uppræta Hamas í eitt skipti fyrir öll og frelsa um 240 gísla samtakanna. Þrátt fyrir hvatningu margra ríkja til að gert verði vopnahlé hafa stjórnvöld í Ísrael ekki tekið það til greina.

Guðlaugur Þór Þórðarson fyrrverandi utanríkisráðherra og núverandi umhverfis- orku- og loftslagsráðherra segir íslensk stjórnvöld ekki þurfa að skammast sín fyrir að hafa verið í þeim hópi ríkja sem þau voru við atkvæðagreiðslu hjá Sameinuðu þjóðunum. Það liggi skýrt fyrir að íslensk stjórnvöld vilji sjá frið á þessu svæði.

„Að sálfsögðu ofbýður manni þetta allt saman. Þetta hófst með hræðulegu hryðjuverki þar sem tvö þúsund ungmenni, að stærstum hluta, voru á tónleikahátíð og voru drepin með köldu blóði. Síðan erum við að sjá hlutina verða verri og verri. Þetta hlýtur öllum að ofbjóða,“ sagði Guðlaugur Þór á leið á ríkisstjórnarfund í morgun.

Sveinn Rúnar Hauksson læknir og fyrrverandi formaður samtakanna Ísland-Palestína þekkir vel til aðstæðna á Gaza og segir þetta vera hryllilegustu árásir sem gerðar hafi verið á Palestínumenn.

„Það deyr eitt barn á tíu mínútna fresti og tvö önnur særð. Allan sólarhringinn. Þetta er hryllingur og við verðum, eins og þú heyrir hér, að krefjast öll sem eitt vopnahlés strax,“ sagði Sveinn Rúnar.

Lilja Alfreðsdóttir menningar- og viðskiptaráðherra segir stöðuna mjög viðkvæma.

„Það eru heitar tilfinningar í þessu. Við höfum alltaf barist fyrir mannréttindum og að virða alþjóðalög og við munum halda áfram að gera það.“

Finnst þér að ríkisstjórnin hefði átt að bregðast öðruvísi við en hún gerði hjá Sameinuðu þjóðunum?

„Ég styð að sjálfsögðu utanríkisráðherra í þessu. Hann greiddi atkvæði eins og aðrar Norðurlandaþjóðir fyrir utan Norðmenn,“ sagði Lilja á leið á ríkisstjórnarfund.

Saga Garðarsdóttir leikkona var á meðal mótmælenda og sagðist vera gjörsamlega nóg boðið.

„Það er ekki hægt að horfa upp á þetta og gera ekki neitt. Ég trúi því ekki að við ætlum ekki að fordæma þetta.“

Hvernig finnst þér að íslensk stjórnvöld hafa tekið á þessu máli?

„Heigulslega. Algerlega. Mér finnst ótrúlegt að þau séu ekki búin að fordæma þetta og ýta undir vopnahlé.“

Þannig að það er sorg í þínu hjarta?

„Já, það er það,“ sagði Saga Garðarsdóttir á mótmælunum við Ráðherrabústaðinn í morgun.

Hér fyrir neðan má sjá myndir frá mótmælunum við Ráðherrabústaðinn og frá Gaza ásamt viðtölum við viðmælendur fréttarinnar í heild sinni: